Обвинителството оформи предмет по допрен глас во врска со случајот со поранешниот вицепремиер Артан Груби и судијата од Апелацискиот суд Енвер Беџети. Гласот овој пат дојде од далеку. Од САД, земјата што ја прошири црната листа и ги додаде овие две лица на неа.
Груби се најде на црната листа на Светскиот ден за борба против корупцијата и во време кога неговата партија кампуваше пред Уставниот суд изразувајќи незадоволство поради иницијативите за Законот за употреба на јазиците. Партиските претставници не еднаш го повторија зборот дестабилизација.
Неделава ја обележи и големата акција на МВР за набавка на адитиви за РЕК Битола и ТЕЦ Осломеј, со која државата била оштетена за 6,5 милиони евра. Во притвор се осум лица, меѓу нив и поранешниот директор на ЕСМ и „Македонски пошти“, Васко Стефанов. Васко Ковачевски, поранешниот директор на ЕСМ, не е достапен за истрагата.
Додека јавноста се занимаваше со црните листи и тендерите на ЕСМ, статистиката пресмета дека инфлацијата значително забрза во ноември. Таа се израмни со мајските податоци и сега изнесува 4,3 отсто. Двигател на инфлацијата повторно се цените на храната. Народната банка во вторник повторно ќе одлучува за каматните стапки во земјава. Што ќе преовлада при одлучувањето – податоците за цените или одлуките на ЕЦБ?
Прочитајте повеќе:
Доктор Гугл допрва ќе биде товар за јавното здравство
Прв македонски автохтон вински квасец: Зошто е тоа битно?
Неделава анализиравме како Македонија ќе ги плаќа долговите во следната, 2025 година. Очекувањата се дека во буџетот ќе се слеат повеќе пари од данок на добивка по најавата на власта дека ќе го измени законот за да се усогласи со глобалниот минимален данок. Со оваа измена паѓаат олеснувањата што ги добиваа странските компании во земјава за да инвестираат тука. Сега, Советот на странски инвеститори смета дека власта треба тие олеснувања да ги трансформира во други за земјава да остане на глобалната инвестициска мапа.
Прочитајте повеќе:
Бугарија и Романија целосно влегуваат во шенген - нови проблеми за македонските транспортери
Со „карта на можности“ до работа во Германија дури и без познавање на јазикот
Проверивме кои професии ќе бидат најбарани следната година во Европската Унија. Пишувавме и за компаниите што се раководени од жени – истражувањата покажуваат дека тие се поуспешни од другите.
Пишувавме и за ефектите од експериментот со четиридневната работна недела во Германија. Тие што се обидоа тешко ќе се вратат на петдневен режим, затоа што, како што велат, „едноставно не сакам да работам во петок“.
Прочитајте повеќе:
Ранг листа: Невиден раст кај одредени акции на Македонската берза
Имате пари? Истраживме дали ќе се исплати да ги инвестирате на берза
Глобално, Илон Маск на еден месец пред официјално да седне во министерската фотелја стана прв човек чие богатство надмина 400 милијарди долари. Неговиот нов шеф, избраниот претседател на САД, Доналд Трамп, се подготвува за судир со Европската Унија.
На неговиот нишан се и технолошките компании, со кои пак Кина отвора војна, исто така во пресрет на влегувањето на Трамп во Белата куќа. На излегување оттаму, сè уште актуелниот претседател Џо Бајден заговара нови санкции против Русија.
Оваа недела ја обележи и падот на сирискиот претседател Башар Ал Асад. По 24 години владеење тој ја напушти и власта и земјата. Доби азил во Русија.
.webp){kind=icon}