Администрацијата ќе протестира и денеска. Протестите ќе се одржат пред министерствата и институциите во кои вработените бараат зголемување на платите за сто евра. Организаторот на протестите, Синдикатот на УПОЗ, ја обвинува власта дека нема слух за нивните барања. Владата обвинува дека протестот не е организиран согласно законот за работни односи.
Добро утро, еве ги останатите пет вести кои се важни за почеток на денот.
Буџетот губи поради неефикасноста на ДДВ
Вкупните приходи во земјата во наредниот петгодишен период се планирани на ниво од околу 36 отсто од БДП. Владата во стратегијата за периодот до 2029 година наведува дека даночните политики ќе обезбедат одржлив економски развој, правна сигурност за даночните обврзници и редовна наплата на јавните приходи.
За наредниот период е планирано даночната политика да биде насочена кон задржување на ниските стапки кај одредени директни и индиректни даноци. Единствено, стои во стратегијата, промени ќе има кај данокот на добивка за тој да се усогласи со глобалниот минимален данок. Овој закон веќе е на сила откако на крајот на декември го помина собранискиот филтер.
На македонскиот извоз не му се пишува добро ни во 2025
Само уште неколку дена нѐ делат од официјалното прогласување на Доналд Трамп за нов американски претседател, а светот е веќе во грч поради неговите најави за трговски царини кон Кина, ЕУ, но и други земји, желбите за купување(анектирање) на Гренланд и спојувањето на Канада кон САД, и останатите фамозни изјави околу идните политики на САД што ги дава периодов откако победи на изборите во ноември.
Колку и да изгледаат некои од нив бизарно или налудничаво, сепак тие предизвикуваат немир на пазарите, па како една од причините за порастот на приносите на обврзниците изминативе месец-два, на пример, се наведуваат токму неизвесностите околу тоа што навистина Трамп ќе спроведе на дело, а што ќе остане само во доменот на популизмот карактеристичен за него. Одлуките на новата американска администрација се поврзуваат и со решенијата на воените конфликти низ светот, се поврзуваат и со делот на економската геополитика – тарифите, царините, производството, пазарот на работна сила, итн.
Трамп и Кина сакаат преку Маск да го спасат Тикток во САД
Кинески официјални лица ја разгледуваат можноста Илон Маск да ги преземе американските операции на Тикток (TikTok) доколку компанијата не успее да ја спречи контроверзната забрана на апликацијата за кратки видеа, според луѓе запознаени со ситуацијата со кои разговарал „Блумберг“ (Bloomberg).
Официјалните лица во Пекинг силно претпочитаат Тикток да остане во сопственост на матичната компанија „Бајтденс“ (ByteDance Ltd.), велат луѓето, и компанијата ја оспорува претстојната забрана со жалба до Врховниот суд на САД. Но, судиите за време на сесијата на 10 јануари сигнализираа дека веројатно ќе го поддржат законот. Високи кинески официјални лица веќе почнале да дебатираат за планови за итни случаи за Тикток како дел од широка дискусија за тоа како да соработуваат со администрацијата на Доналд Трамп, од кои еден го вклучува Маск, велат упатените, барајќи да не бидат идентификувани бидејќи станува збор за доверливи дискусии.
Енергетски снабдувач обвинет за пожарот во Лос Анџелес
Енергетскиот снабдувач „Едисон интернешнал“ (Edison International Inc.) во јужна Калифорнија се соочува со тужби во кои се посочува неговата опрема како причина за еден од пожарите што сè уште беснеат во вториот по големина град во САД.
Првата од неколкуте тужби доставени во понеделникот е поднесена во име на група сопственици на домови, станари, сопственици на бизниси и други со имоти уништени од смртоносниот пожар Итон во областа Пасадена. Тужбите тврдат дека инфраструктурата за достава на електрична енергија на „Едисон“ била причина за пожарот што ја уништил населбата Алтадена. Се очекува првичните тужби да бидат проследени со илјадници други правни побарувања.
Европа ја обзема оптимизам дека Трамп нема да ја напушти Украина
Европските сојузници на Украина стануваат претпазливо оптимистични дека новоизбраниот претседател на САД, Доналд Трамп, нема да го принуди Киев на прерани преговори со Русија.
Ваквото расположение следува по серија приватни разговори со членови на тимот на Трамп, во кои трансатлантските партнери ја презентирале иницијативата за продолжена поддршка за Украина, според европски официјални лица запознаени со ситуацијата, кои одбија да бидат именувани затоа што станува збор за разговори зад затворени врати.
.webp){kind=icon}