Што ќе правиме ако се укине Тикток - пет вести на денот

Eден од четирите најголеми тениски гранслем-турнири во светот - Австралија опен, реши да ги помести границите во пристапот кон публиката, па покрај искуството во живо, да понуди и анимирана верзија на често напнатите мечеви меѓу врвните тенисери, која во реално време ја следи фактичката состојба на натпреварот.

Подетално - на официјалниот канал на Австралија опен на Јутјуб (YouTube) може да ги следите натпреварите „во живо“, според тоа што моментално се игра, ама гледајќи анимирани играчи на виртуелен терен.

Добро утро! Ова се петте вести што треба да ги знаете на почетокот од денот.

Македонија дебело се офајди од глобалната златна треска

Континуираниот раст на вредноста на златото во изминативе неколку години кулминира во текот на минатата година, а според првичните сигнали од првите две недели во 2025 година веројатно цената на скапоцениот метал ќе продолжи да се зголемува и во наредните месеци. 

Ваквите трендови позитивно влијаат врз македонските девизни резерви, од кои дел е пласиран во монетарно злато. Имено, од почетокот на 2019 година заклучно со минатата година вредноста на златните резерви на Македонија пораснала повеќе од двапати односно од 256 милиони евра на 554 милиони евра.  

Каде се македонските компании на стриминг-платформите?

За да привлечат повеќе корисници, особено на пазарите во развој, стриминг-платформите освен што нудат поевтина претплата со реклами и поскапа без реклами, нудат и специјални нивоа на цени, како што се на пример поевтините пакети наменети само за мобилни телефони.

Иако кај македонските компании голем е интересот за рекламирање на ваков тип платформи, за жал, на нашиот пазар многу малку од нив дозволуваат огласување. Од тоа што е на располагање, најкористена платформа за огласување е „Јутјуб“, иако во последно време многу е популарна и аудиостриминг-платформата „Спотифај“ (Spotify).

Што ќе прават брендовите и креаторите на содржини без Тикток?

Тикток како платформа има недвосмислено влијание врз културата, создавањето и развојот на трендовите, а влијае и врз навиките на потрошувачите.

Во случај на забрана на Тикток во САД, модата и другите брендови ќе се соочат со предизвици во одржувањето директни врски со младата и активна публика, која доминантно е присутна токму на оваа платформа. Следствено, тие ќе мора да ги приспособат своите маркетинг-стратегии за да ја компензираат загубата. Тоа значи дополнително развивање на сопствените дигитални канали - и тоа брзо. Некои го гледаат ова како можност за освежување на содржината на дигиталните канали со некој покреативен пристап.

Како што се приближува потенцијалната забрана, значителен број корисници на Тикток се пренасочуваат кон алтернативната кинеска платформа Шјиаохонгшу (Xiaohongshu), позната и како Редноут (RedNote).

Доставата не го следи растот на е-трговијата во регионот

Доставата и логистиката и понатаму остануваат најголем предизвик за е-трговците во Македонија и регионот, и тоа во однос на брзината на доставата, високите цени на доставата, доверливоста на курирските услуги, ограничените опции за достава, како и релативно ниското ниво на професионалност на кадарот на доставувачи. За ова последново просечната оценка за регионот е 3,92, а интересно е што македонските е-трговци дале и повисока оценка, 4,55 на скала од 1 до 5.

„Иако се едни од најбрзорастечките бизнис-сектори како последица на развојот на е-трговијата, логистиката и доставата изминативе години не добиваат ама баш никаква поддршка од државата, туку, напротив, дури и се кочат со извесни политики и регулативи“, вели Игор Гешовски, сопственик на „Еко логистик сервис“ (ЕЛС), компанија за поштенски услуги. „На пазарот владее страшна нелојална конкуренција. Од нигде никаде се појавуваат фирми што без никаква лиценца за работа почнуваат да оперираат на пазарот за поштенски и курирски услуги и уште јавно се рекламираат дека станале официјални доставувачи за некои брендови“, додава тој.

Џеф Безос ја лансира ракетата „Њу Глен“ во вселената

Ракетата „Њу Глен“ (New Glenn) на американската вселенска компанија „Блу ориџин“ (Blue Origin) беше лансирана во орбитата на Земјата. Тоа е најголемата ракета што компанијата на Џеф Безос ја испрати во вселената, што ја прави конкурент на „Спејс екс“ (SpaceX) на Илон Маск.

Иако компанијата веќе неколку години носи туристи во вселената со својата ракета „Њу Шепард“ (New Shepard), таа сѐ уште не извела ниту еден орбитален лет.

Но, сега, со многу помоќната „Њу Глен“ планира да се пробие на новиот пазар, на пазарот за лансирање комерцијални и воени сателити во орбитата, како и вселенски летала и астронаути.