Владата уште еднаш линеарно ќе ги зголеми пензиите. Според најновите најави првото зголемување од 1.000 денари македонските пензионери ќе го добијат наесен, непосредно пред гласањето на локалните избори, а второто со истата сума е планирано за напролет. Затоа, денеска „Блумберг Адрија“ анализира како се движат финансиските позиции за исплатата на пензиите, а и кои се плановите за до крајот на годинава и следните две години.
Добро утро, ова се петте вести што се важни за почеток на денот.
„Блекрок“ е најголем инвеститор во македонски обврзници
Во трката на еврото за превласт, дојде до промена и на листата финансиски институции кои поседуваат најголем дел од македонскиот долг по основ на обврзници.
Според терминалот на „Блумберг“ во моментов „Блекрок“, една од водечките светски инвестициски компании е најголем кредитор на Македонија. На второто место е германската финансиска компанија „Алијанц“. На трето место е „Јунион инвестмент“ од Луксембург. Целосната анализа прочитајте ја тука.
ББА анализа: Како ќе се движи цената на златото до крајот на годината?
Златото го продолжи својот силен тренд на раст во 2025 година, по нестабилниот крај на 2024 година. Макроекономските тензии и промените во монетарната политика придонесоа за зголемена побарувачка за злато и кај инвеститорите и кај централните банки. Во текот на 2024 година, централните банки продолжија со силните купувања на злато, иако беше забележано мало забавување на почетокот на 2025 година.
Првата половина од 2025 година беше обележана со интензивен раст на златото. Цената се искачи над 3.000 долари во првиот квартал и достигна рекордно високо ниво од над 3.400 долари за унца во април, во текот на вториот квартал. Златото ја зголеми својата вредност за приближно 25 проценти оваа година. Иако одржуваше тренд на раст, движењето на цената покажа периоди на нестабилност, особено во периодите на зголемени геополитички тензии и промени во трговската политика.
Славески: Треба да се актуелизира прашањето за личен банкрот
Како и многупати досега, повторно на маса се стави идејата за озаконување на можноста за личен банкрот. Имено, на денешната работна средба во Стопанската комора, гувернерот на Народната банка, Трајко Славески, рече дека не може до бесконечност да се толерираат луѓе кои не во состојба да ги намируваат своите обврски, отварајќи ја можноста за дискусија за воспоставување регулатива со којашто би се овозможил личен банкрот.
Додека во многу земји во светот можноста за личен банкрот функционира на тој начин што на физичките лица што се презадолжени им обезбедува шанса за нов почеток со индивидуално приспособен план за раздолжување, кај нас и натаму останува невозможна опција.
Биткоинот има нова намена – што може да тргне наопаку
Кога биткоинот го привлече вниманието на јавноста во 2013 година, идејата што стоеше зад него брзо ја разгоре фантазијата на луѓето: дигитална валута за инстантни, анонимни плаќања без потреба од банка. Цената тогаш експлодира – од околу 13 долари порасна на 747 долари.
Дванаесет години подоцна, најпознатата криптовалута во светот надмина 120.000 долари. Илјадници луѓе стекнаа (а некои и загубија) големи богатства благодарение на неа. Но, и покрај целиот говор за тоа дека биткоинот оди „во мејнстримот“, тој никогаш сериозно не се закани да ги замени обичните валути – не го користиме за да купиме намирници, автомобил или да испратиме пари преку граница – иако токму трансферот на пари е бизнис што е очигледно подложен на влијание поради високите надоместоци.
Јапонските обврзници остануваат ранливи по поразот на Ишиба
Јапонските државни обврзници се ранливи на понатамошна продажба по историскиот изборен пораз на премиерот Шигеру Ишиба (неговата коалиција го загуби мнозинството во Горниот дом на Парламентот), иако првичната реакција во вторник беше ублажена од порастот на глобалните пазари на долгови.
Дваесетгодишните и четириесетгодишните обврзници на нацијата благо паднаа по продолжувањето на тргувањето во Токио, зголемувајќи ги приносите за 1 и 4 базични поени, соодветно. Акциите паднаа, а нивните изгледи остануваат под влијание на царините. Јенот, кој исто така ослабе, се соочува со ризици од пад поради изгледите за поголема државна потрошувачка.
.webp){kind=icon}
Во моментов нема коментари за веста. Биди прв да коментира...