Корисниците имаа многу поголеми очекувања од апликации како Тиндер. Идејата дека тие ќе го олеснат пристапот до потенцијални партнери не се оствари за многумина.
Напротив, присуството на тие апликации често доведе до незаинтересираност, игнорирање, понижување и општ љубовен неуспех.
Решението за овие проблеми – или барем за дел од нив – компаниите го гледаат во вештачката интелигенција.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
На половина од Македонците не им се доволни 20 дена за одмор
Работниците во Македонија имаат најмал број денови за годишен одмор, покажува регионалното истражување на компанијата „Алма кариер“, водечка компанија во областа на вработувањето во Средна и Источна Европа. Истражувањето било спроведено меѓу повеќе од 2.500 испитаници од Македонија, Босна и Херцеговина и Хрватска. Прашањата што им биле поставени се однесуваат на правото на годишен одмор, како и на исплатата на регрес за годишен одмор.
На прашањето колку денови годишен одмор се потребни за тој да биде идеален, испитаниците во сите три земји побарале речиси цела седмица повеќе.
Хрватите би одморале цел месец, а работниците во Босна и Херцеговина и во Македонија сметаат дека 28 дена годишен одмор би претставувале оптимална мерка за одржување рамнотежа меѓу работата и приватниот живот.
Наскоро промени во вториот пензиски столб
Се ближи ли конечно денот кога приватните пензиски друштва од вториот, задолжителен пензиски столб, ќе можат да инвестираат и во поризични финансиски инструменти? Според зборовите на Дарко Саздов, член на Советот на експерти на МАПАС, веројатно да.
Имено, од Саздов добивме потврда дека во месец јули е формирана работна група составена од претставници на повеќе надлежни министерства, агенции и фондови, којашто во рок од шест месеци треба да го изготви конечното предлог-решение за промена на регулативата во делот на задолжителното приватно пензиско осигурување, односно вториот пензиски столб.
Клучната промена ќе биде можноста приватните пензиски друштва инвестициите да ги врзуваат за животниот циклус, односно за помладите членови на фондовите средствата да се инвестираат во поризични хартии од вредност.
Каде да инвестирате 10.000 долари
„Блумберг“ праша стручњаци за инвестиции да посочат на актуелните прилики. Едни се фокусирани на американскиот пазар на акции, особено на акции поврзани со развојот на вештачка интелигенција, а други советуваат да се внимава на нафтата. Поединци како прилика за инвестирање ги гледаат акциите на компании од европската одбранбена индустрија и осигурување, а советуваат да се внимава и на финансиските акции, кои би можеле да извлечат корист од дерегулацијата.
Исто така, ги прашавме стручњаците како би потрошиле неочекуван приход од 10.000 долари. Меѓу идеите се: посетување на натпревари на омилениот спортски тим низ целиот свет, семејно патување во Австралија, но и вложување во унапредување на здравјето...
Дубаи не е лага - седум причини зошто заслужува посериозен третман
Кај голем дел од јавноста во нашиот поширок регион Дубаи сè уште се третира со резерва. Како да станува збор за нешто зад завесите, вештачка конструкција без вистинска економска моќ зад себе. Наративот „сè е само шминка“ е сè уште присутен, од чаршиските муабети до бизнис-конференциите.
Сепак, оваа теза повеќе не држи вода ниту со основните бројки, а не, пак, ако станува збор за сериозна анализа. Дубаи не е само луксузен туризам, трговски центри и естетика на Инстаграм. Тој е економски и финансиски центар од глобално значење, град што во сè потешки геополитички и макроекономски услови успева да бележи раст, диверзификација и геостратешка релевантност.
Истакнуваме седум причини зошто е време да престанеме да го гледаме Дубаи како „меур“, туку да го гледаме таков каков што е - сериозен бизнис, логистички и инвестициски центар на 21 век.
Кина ќе се бори против американскиот монопол над вештачката интелигенција
Кина ќе го предводи основањето на меѓународна организација за заеднички развој на вештачка интелигенција (англ. artificial intelligence – AI), изјави кинескиот премиер, сакајќи да обезбеди оваа револуционерна технологија да не стане привилегија само на неколку држави или корпорации.
Вештачката интелигенција (ВИ) носи со себе ризици – од масовно губење на работни места до економски потреси – кои бараат заеднички одговор од државите, изјави премиерот Ли Чијанг на Светската конференција за вештачка интелигенција (англ. World Artificial Intelligence Conference), која се одржа во саботата во Шангај. Тоа подразбира повеќе меѓународна соработка и размена, порача вториот човек во кинеската политика на најважниот годишен технолошки собир во земјата.
.webp){kind=icon}
