Половина од Македонците бараат повеќе денови за одмор - 20 не се доволни

Работниците во Македонија имаат најмал број денови за годишен одмор, покажува регионалното истражување на компанијата „Алма кариер“, водечка компанија во областа на вработувањето во Средна и Источна Европа. Истражувањето било спроведено меѓу повеќе од 2.500 испитаници од Македонија, Босна и Херцеговина и Хрватска. Прашањата што им биле поставени се однесуваат на правото на годишен одмор, како и на исплатата на регрес за годишен одмор.

Истражувањето покажува дека во земјава во просек годишниот одмор трае 20,3 дена. Во БиХ работниците одмораат во просек 21 ден, а во Хрватска, земја членка на Европската Унија, просечниот одмор трае дури 25 дена. Во земјава должината на годишниот одмор е уредена со Законот за работни односи и е ограничена на најмалку 20 дена. Колективните договори, пак, можат да предвидат поголем број денови, но не повеќе од 26.

Истражувањето покажува сериозни разлики во бројот на денови за одморање во јавниот и приватниот сектор, но и меѓу приватните компании со домашни и странски сопственици. Не е изненадување показателот дека вработените каде што работодавец е државата користат подолг одмор, два дена повеќе од просекот. Подолг одмор користат и вработените во приватни компании со странски газда, кои имаат 21,1 ден годишен одмор. За работниците, пак, во фирми со домашен газда одморот е пократок од законскиот минимум и трае 19,4 дена.

Според резултатите од истражувањето, бројот на денови годишен одмор расте пропорционално со големината на работодавецот. Најизразени разлики се забележуваат во Хрватска, каде што големите компании и јавните институции со 200 и повеќе вработени овозможуваат во просек 26,5 дена годишен одмор. Слично е и во Македонија, големите компании обезбедуваат 21 ден, средно големите 20,2 дена, а малите 19,5 дена годишен одмор.

Македонските работници се најзагрижени за продуктивноста

Според истражувањето, 57 отсто од македонските работници се незадоволни од должината на годишниот одмор, 20 отсто се задоволни од бројот на слободни денови, а 23 отсто сметаат дека подолг одмор ќе ја наруши и така ниската продуктивност.

Овој процент е значително повисок од другите земји во регионот. Само 7 отсто од босанските и 4 отсто од хрватските работници се грижат за продуктивноста.

Идеалниот одмор трае 28 дена

На прашањето колку денови годишен одмор се потребни за тој да биде идеален, испитаниците во сите три земји побарале речиси цела седмица повеќе.

Хрватите би одморале цел месец, а работниците во Босна и Херцеговина и во Македонија сметаат дека 28 дена годишен одмор би претставувале оптимална мерка за одржување рамнотежа меѓу работата и приватниот живот.

Во пишувањето на текстот помогна Ивана Раониќ, „Блумберг Адрија“, БиХ

Во моментов нема коментари за веста. Биди прв да коментира...

Остави коментар