Европските производители на автомобили би можеле да забележат пад на производството за повеќе од милион возила по квартал, почнувајќи од крајот на годинава. Ова ќе продолжи и во текот на 2023 година, бидејќи зголемените трошоци за енергија го оптоваруваат синџирот на снабдување, се вели во извештајот.
Недостигот на делови и тесните грла во снабдувањето веројатно најмногу ќе натежат врз производителите на автомобили во периодот од ноември до пролетта 2023 година, особено ако залихите на енергија се намалуваат во текот на постудените зимски месеци, се вели во извештајот од вторникот на S&P Global Mobility.
„Притисокот врз синџирот на снабдување со автоделови ќе биде интензивен“, смета аналитичарот Едвин Поуп. „Фабриките можеби ќе треба да ги запрат испораките на возила поради недостиг на поединечни компоненти“, додава тој.
Владите ширум Европа интервенираат за да го намалат влијанието на енергетската криза, но мерките можеби нема да бидат доволни за заштита на автомобилската индустрија од намалување на производството во текот на зимата. И снабдувањето, исто така, засега ќе се соочи со проблеми бидејќи некои добавувачи спроведуваат енергетски ефикасни смени.
Bloomberg
Недостигот на делови и тесните грла може да го запрат производството слично како за време на пандемијата и руската инвазија на Украина, се вели во извештајот.
S&P прогнозира дека европските фабрики ќе произведуваат од 4 до 4,5 милиони возила по квартал. Доколку се воведат енергетски ограничувања, производството на автомобили би можело да се намали на 2,8 милиони по квартал. Тоа на годишно ниво би значело од 4,8 милиони до 6,8 милиони единици изгубено производство.
Засега, некои производители на автомобили сè уште известуваат за големи добивки. Mercedes Benz AG во вторникот соопшти дека продажбата пораснала за повеќе од една петтина во текот на третиот квартал, и покрај проблемите со синџирот на снабдување, инфлацијата и лошите економски изгледи.
Прогнозата се заснова на 11 главни центри за производство на автомобили во Европа. Таа ги рангирала според тоа кои земји се најдобро позиционирани да ги издржат очекуваните енергетски шокови во текот на зимата.
Чешка и Германија се на прво место, при што Германија има голема корист од нејзината релативно мала зависност од електрична енергија добиена од гас и тековното ниво на складиран гас, се вели во извештајот. Фабриките во Шпанија, Италија и Белгија се соочуваат со најголеми ризици, при што сите три земји добиваат најниска оценка за енергетска самодоволност.
.webp){kind=icon}
