Лагард вели дека каматите ќе растат сè до инфлација од два отсто

Претседателката на Европската централна банка (ЕЦБ), Кристин Лагард, изјави дека врвот на тековниот циклус на зголемување на каматните стапки, на среден рок мора да обезбеди враќање на инфлацијата до посакуваната цел од два отсто.

Без да го прецизира нивото за т.н. терминална каматна стапка, Лагард рече дека трошоците за кредитирање дополнително ќе се зголемат по минатонеделното второ последователно покачување од 75 базични поени.

„Крајната дестинацијата е јасна, а ние сè уште не сме таму“, изјави претседателката за летонска веб-страница, во интервју објавено во вторникот.

Инфлацијата во 19-члената еврозона достигна рекордни 10,7 отсто во октомври, надминувајќи ги процените на аналитичарите, иако економскиот раст ослабна, а многумина предвидуваат и пад во текот на зимата, бидејќи Русија го намалува снабдувањето со енергенти.

Лагард призна дека веројатноста за рецесија е зголемена, но предупреди на опасноста од непреземањето никакви мерки во борбата со горливата инфлација, нарекувајќи ги стабилните цени „основа за непречено функционирање на економијата од која корист имаат сите“.

Бавен раст, силна инфлација / Bloomberg Mercury

„Инфлацијата во еврозоната е сè уште превисока“, рече таа. „Колку подолго инфлацијата стои на ова високо ниво, толку е поголем ризикот таа да се прошири на целата економија. Тогаш и потрошувачите и бизнисите ќе почнат да очекуваат поголема инфлација во иднина, а тоа е опасно“, вели Лагард.

Додека зголемувањето на каматните стапки ги зголемува хипотекарните записи и им наштетува на корпоративните должници, Лагард нагласува дека банките се во посилна позиција отколку пред кризата во 2008 година. И покрај тоа, „не смее да се дозволи самозадоволство“, посочи таа.

„Владите мора да се погрижат секоја фискална помош да биде привремена и насочена кон оние на кои им е најпотребна“, додаде Лагард.

Во моментов нема коментари за веста. Биди прв да коментира...

Остави коментар