Неочекувано голем пад на инфлацијата во Франција

Инфлацијата во Франција се намали повеќе од очекуваното, достигнувајќи најниско ниво во изминатава година, што е поттик за претставниците на Европската централна банка кои велат дека зголемувањето на каматните стапки наскоро може да заврши.

Годишните промени на потрошувачките цени во втората по големина економија во еврозоната се намалија на 6 проценти во мај од 6,9 проценти во април, според податоците објавени денеска. Тоа е поголемо забавување отколку што проценија економистите анкетирани од „Блумберг“ кои очекуваа стапка на инфлација од од 6,4 проценти.

Резултатот дојде благодарение на падот на цените во повеќе сектори, а особено во енергетиката. Според статистичката агенција „Инси“ (Insee), инфлацијата на стоките и услугите, која будно ја следат претставниците на ЕЦБ, исто така се намали на 4,1 и 3 проценти.

Податоците за Франција следуваат по објавата за инфлацијата во Шпанија, која исто така се намали над очекувањата. Податоците за инфлацијата во Германија треба да бидат објавени во текот на денов, а утре се очекува информација за стапката на инфлација за еврозоната, во која членуваат 20 нации.   

Трговците на пазарот на пари ги намалија облозите за идните зголемувања на каматните стапки и повеќе не очекуваат покачувања за 50 базични поени годинава во иста мера како претходно. Германските обврзници зајакнаа, при што приносите на двегодишните и на петгодишните обврзници паднаа за дури десет базични поени. Вредноста на еврото се намали и вчера се тргуваше за 1,0673 долари, што е најниско ниво во изминативе два месеци.  

Иако падот на основната стапка на инфлација е добредојден за ЕЦБ и за француската Влада, ценовните притисоци се‘ уште се присутни и продолжуваат да предизвикуваат главоболки за двете страни.

Гувернерот на Банката на Франција, Франсоа Вилерој де Галхау, минатата недела рече дека базичната инфлација „покажува упорност“ и дека услугите најверојатно ќе станат доминантна сила што ќе ги поттикне цените.

Мадис Мулер, член на Управниот совет на ЕЦБ претходно рече дека веројатно ќе има зголемување на каматните стапки повеќе од еден квартал, предупредувајќи дека базичната инфлација „за жал сè уште не покажува знаци на забавување“.

На претседателот Емануел Макрон се чини дека му е потешко да ги ублажи зголемените трошоци за живот во Франција отколку трошоците за енергија. Како дел од кампањата за намалување на профитните маржи, Министерството за финансии изврши притисок врз големите прехранбени компании повторно да преговараат за цените со супермаркетите.

Во посебно соопштение, „Инси“ информира дека потрошувачката паднала за еден процент во април бидејќи домаќинствата ги намалуваат трошоците за храна и енергија. Економистите анкетирани од „Блумберг“ очекуваа зголемување од 0,3 проценти.

Во моментов нема коментари за веста. Биди прв да коментира...

Остави коментар