ЕЦБ одлучи да паузира по низата покачувања на каматите

Европската централна банка ги остави каматните стапки непроменети за прв пат по повеќе од една година, бидејќи проценува дали преку историската серија зголемувања ќе успее да ја намали инфлацијата. По минатомесечната одлука да се подигне депозитната стапка на рекордни четири проценти, креаторите на политиката денеска решија да ја остават на исто ниво, што е во согласност со  предвидувањата на сите економисти анкетирани од „Блумберг“ и со предвидувањата на аналитичкиот тим на „Блумберг Адрија“.

Во денешното соопштение од ЕЦБ повторија дека задржувањето на трошоците за задолжување на тоа ниво доволно долго ќе даде „значителен придонес“ за враќање на растот на потрошувачките цени до целта од два проценти.

Како и монетарните власти во САД и Велика Британија, ЕЦБ не ја затвори вратата за понатамошни зголемувања доколку инфлацијата не успее доволно брзо да се намали. Но, мал е сомнежот меѓу економистите и инвеститорите дека највисоката точка за трошоците за задолжување во еврозоната не е достигната по 10 последователни покачувања почнувајќи од јули 2022 година.

Bloomberg

Тоа ги поттикна облозите за тоа кога ќе пристигнат првите намалувања на каматните стапки, при што инвеститорите следејќи го наративот „повисоко за подолго“ на ЕЦБ се обложуваат за намалување од следната есен и покрај тоа што регионот е во ризик конечно да подлегне на рецесија.

Официјалните лица не нудат многу индиции, туку се фокусираат на други лостови - првенствено, портфолиото на пандемични обврзници од 1,7 трилиони евра (1,8 трилиони долари), познато како PEPP.

Прекинувањето на PEPP побрзо од тековно планираното ќе го зајакне монетарното затегнување и ќе го забрза укинувањето на стимулацициите доделени во ерата на пандемијата. Но, таквиот потег може да се покаже како контроверзен во време кога тензиите на Блискиот Исток се закануваат да ги покачат цените на нафтата, финансиите на италијанската влада ги загрижуваат инвеститорите, а економијата на еврозоната е на незавидно ниво.

„Новите податоци нашироко ја потврдија претходната оценка за среднорочната перспектива на инфлацијата“, соопшти Управниот совет. „И понатаму се очекува инфлацијата да остане премногу висока предолго, а домашните ценовни притисоци остануваат силни“.

Претседателката Кристин Лагард ќе ја објасни одлуката на прес-конференција во 15:45 часот во Атина, каде што Управниот совет се собра на еден од неговите редовни состаноци надвор од неговото седиште во Франкфурт.

Соопштението на ЕЦБ доаѓа по мноштвото состаноци за глобалните стапки. Во средата, Банката на Канада ги задржа стапките непроменети втор пат по ред, додека ја остави отворена можноста за дополнително заострување. Следната недела ќе има одлуки на Федералните резерви и Банката на Англија. Се очекува и двете институции да стагнираат во покачувањата.

Од нивниот последен собир во септември, претставниците на ЕЦБ забележаа забавување на инфлацијата повеќе од очекуваното. Овој месец може да се спушти на најниско ниво во последните две години на околу три проценти, според проценката на „Блумберг Економикс“.

Но, иако порастот на стапките им користи на заемодавците како „Дојче банк“, бројките за бруто домашниот производ во третиот квартал за 20-члената еврозона, кои треба да се објават следната недела, веројатно ќе покажат слаб раст во најдобар случај. Анкетите на менаџерите за набавки за октомври сигнализираа дека и производниот и услужниот сектор се заглавени во падови.

Германија, најголемата економија во валутниот блок, е и нејзина најголема грижа бидејќи се соочува со изгледите за втора рецесија за нешто повеќе од една година.

Со помош на Јана Рендоу, Александар Вебер и Сотирис Никас (Блумберг)

Во моментов нема коментари за веста. Биди прв да коментира...

Остави коментар