.webp){kind=icon}
Во 2022 година, 13 земји на ЕУ кои имаат производство на нуклеарна електрична енергија создадоа 609.255 гигават часови (GWh) нуклеарна електрична енергија, што е намалување од 16,7 проценти во споредба со 2021 година), соопшти Еуростат.
„Ова е најниското ниво регистрирано во периодот од 1990 година, прва година за која се достапни споредливи податоци за сите земји на ЕУ. Сепак, нуклеарните централи учествуваа со над една петтина (21,8 проценти) од вкупното производство на електрична енергија во ЕУ.“, посочуваат од европската статистичка организација.
Оттаму објаснуваат дека намалувањето во голема мера се должи на одржувањето и поправките на реакторот во најголемиот производител на нуклеарна енергија во ЕУ - Франција.
Прочитај повеќе
Ќе се вртиме ли кон нуклеарни централи и каде се Македонија и регионот?
Еден нуклеарен реактор заменува над три милиони фотопанели или 431 ветерна турбина.
19.10.2023
„Во 2022 година, француските нуклеарни централи произведоа 84.630 GWh помалку електрична енергија (-22 проценти) отколку во 2021 година. Дополнително, на последниот ден од 2021 година Германија трајно затвори три од своите реактори, преполовувајќи го своето производство на нуклеарна енергија.“, наведуваат од Еуростат.
Од организацијата додаваат дека во септември 2022 година бил затворен и реактор во Белгија.
„Со овие четири исклучувања и еден нов реактор во Финска, имаше 103 оперативни нуклеарни реактори во ЕУ на крајот на 2022 година, во споредба со 106 на крајот на 2021 година.“, велат од Еуростат.
Инаку, Франција произведе речиси половина од вкупната нуклеарна енергија на ЕУ (48,4 проценти), потоа е Шпанија (9,6 проценти), Шведска (8,5 проценти) и Белгија (7,2 проценти). Овие четири земји заедно произвеле 73,7 проценти од вкупната количина електрична енергија од нуклеарни извори во ЕУ.
„Франција остана земја на ЕУ која најмногу се потпира на нуклеарна електрична енергија, која претставуваше 62,8 проценти од целата електрична енергија произведена во земјата во 2022 година.“, укажуваат од Еуростат.
Единствената друга земја на ЕУ со повеќе од половина од својата електрична енергија произведена во нуклеарните централи е Словачка (60,2 проценти). Меѓу земјите кои се потпираат на нуклеарна електрична енергија, најниско учество во вкупното производство имаат Холандија (3,4 проценти) и Германија (6 проценти).
