Рускиот буџет се полни поради растот на цената на нафтата

Русија објави нагло зголемување на приходите во првиот квартал, што се должи делумно на еднократните даночни плаќања и зголемените цени на нафтата, додека земјата продолжува да ги надминува последиците од санкциите што ѝ се наметнати поради војната во Украина.

Русија забележа „одржлива позитивна динамика“ во приливот на пари во федералниот буџет, се наведува во соопштението на Министерството за финансии во понеделникот. Приходите за трите месеци до март изнесуваат 8,7 трилиони рубли (94 милијарди долари), што претставува зголемување од 53,5 отсто во споредба со истиот период минатата година, покажаа податоците на Министерството.

Приливите од неенергетските индустрии се зголемија за 43 проценти на годишно ниво, формирајќи „стабилна основа за понатамошен раст на приходите“, соопшти Министерството за финансии. Значително придонесоа плаќањата од „еднократна природа“, вклучувајќи ги и излезните такси што ги плаќаат странските компании што ја напуштаат Русија.

Bloomberg Mercury

Приходите од нафта и гас пораснаа брзо, зголемувајќи се за речиси 80 отсто во однос на минатата година, поттикнати од растот на цените, како и еднократното плаќање данок од нафтените компании.

Суровата нафта од типот брент во понеделникот се тргуваше над 90 долари за барел, што е за речиси 20 отсто повеќе од почетокот на годината поради ескалацијата на геополитичките тензии и шоковите во снабдувањето.

Во 2023 година приходите од енергија се намалија за 23,9 отсто, на 8,8 трилиони рубли, и покрај фактот што вкупните буџетски приходи покажаа мал пораст во споредба со 2022 година. Тоа е делумно и поради забраните на Европската Унија на поголем дел од увозот по морски пат на сурова нафта и нафтени производи од Русија, секако и на ценовните ограничувања на Групата седум, двете наменети да ја казнат земјата за нејзината инвазија на Украина.

„Што се однесува на приходите, нафтата и гасот не нè изненадија“, вели Софија Донетс, економистка во „Ренесенс капитал“ (Renaissance Capital). „Ненафтените и гасните сектори покажуваат силна динамика и се нешто над нашите очекувања“.

Русија забележа буџетски дефицит од крајот на 2022 година, бидејќи воените трошоци од инвазијата на претседателот Владимир Путин на Украина силно им тежеа на државните финансии.

Трошоците во првиот квартал од 2024 година се зголемени за 20 отсто во споредба со минатата година. На крајот на периодот, буџетскиот дефицит изнесуваше 607 милијарди рубли, што е за 1,5 трилион рубли помалку од периодот на крајот на првиот квартал од 2023 година.