Германија се задолжува за дополнителни осум милијарди евра

Следната година германската сојузна влада ќе има поголем простор за задолжување, а новиот нето-долг ќе изнесува околу 24 милијарди евра наместо 16 милијарди евра, како што предвиде Министерството за финансии во јули, велат упатени извори.

Според Уставот, државата може да троши само онолку колку што заработува (должничка кочница), а нормите поврзани со тој механизам дозволуваат дополнителен простор за задолжување само во моменти на послаба економија. Со оглед на актуелната ситуација, министерот за финансии Кристијан Линднер целосно ќе ги искористи дополнителните осум милијарди евра што се на располагање, велат анонимни извори.

Новиот нето-долг се предвидува да биде околу 40 милијарди евра годинава, што е секако пад од 70 милијарди евра во 2023 година, откако Линднер ги утврди уставните лимити за задолжување за првпат од 2019 година. За плановите за дополнително задолжување следната година првпат објави „Шпигел“ (Der Spiegel).

Таканаречената коалиција „семафор“ - социјалдемократи, зелени и либерали - има цел да го одобри предложениот закон за буџет за следната година во владата на почетокот на јули, пред да биде испратен во парламентот во средината на август. Веројатно ќе има неколку недели меѓупартиски расправии (поголем дел од нив покриен од медиумите) пред да се постигне договор, бидејќи Линднер бара „воздржано трошење“ од своите колеги од кабинетот.

За потсетување, должничката кочница претходно беше суспендирана за да помогне во справувањето со последиците од пандемијата на ковид-19 и енергетската криза, но нејзиното обновување значи дека сите министерства, освен за одбрана, повторно ќе мора да се задоволат со помалку пари во 2025 година.

Министерот за одбрана Борис Писториус е „исклучен“ од плановите за штедење за да ѝ се дозволи на Германија да го исполни ветувањето на Шолц за целта во НАТО: да троши најмалку два отсто од бруто-домашниот производ за вооружените сили на долг рок.

Последната буџетска дилема на Германија е уште еден знак за тоа колку минатогодишната одлука на Уставниот суд за користење вонбилансни средства доведе до промена на финансиското планирање на владата. Пресудата значеше дека задолжителното трошење, кое е основа на коалицискиот план, одеднаш беше ограничено со лимитот за задолжување што официјалните лица мислеа дека го заобиколиле.

По испраќањето во парламентот, предложениот закон за буџетот за 2025 година се очекува да биде одобрен од пратениците и во Долниот (Бундестагот) и во Горниот дом (Бундесрат), каде што се претставени 16 региони, до крајот на годината.