По дванаесет години надзор на Европската комисија, дојде историски ден за Грција и Грците кои вртат нова страница, објави во саботата грчкиот премиер, Киријакос Мицотакис.
„Завршува циклусот од 12 години, кој му донесе болка на грчкиот народ, ја забави економијата и го подели општеството“, рече тој.
Во 2010 година, во времето на тешката финансиска состојба на земјата, грчката влада се обрати за помош до Европската унија, Европската централна банка и Меѓународниот монетарен фонд, пишува агенцијата „Франс прес“.
Таканаречената „тројка“ во три наврати ѝ позајми на Грција 289 милијарди евра, барајќи мерки за штедење за подобрување на јавните финансии и полнење на државната каса. Грција ги намали пензиите и платите, ги зголеми даноците, го запре вработувањето во јавниот сектор и ги намали буџетите на администрациите, болниците и јавните тела.
Третиот круг помош заврши во 2018 година, но Европската комисија тогаш започна засилен мониторинг на грчката економија за да го контролира спроведувањето на реформите.
Атина, исто така, вети дека ќе одржи буџетски суфицит од 3,5 отсто додека не се отплати долгот.
„Грција денес е поинаква земја. Имаме силен раст и значителен пад на невработеноста од 3 отсто од минатата година и 5 отсто од 2019 година“, рече Микотакис.
Европската комисија предвидува раст на БДП за Грција од 4 отсто оваа година, додека еврозоната во просек ќе порасне за 2,6 отсто.
Невработеноста во Грција и понатаму е меѓу највисоките во еврозоната, минималната плата е најниска, а јавниот долг од 180 отсто останува товар за економијата.
.webp){kind=icon}
