Руската компанија „Гаспром“ соопшти дека „Северен тек“, нејзиниот клучен гасовод кон Европа нема повторно да се отвори како што беше планирано, со што регионот е чекор поблиску до прекини, рационализирање и тешка рецесија.
Гасоводот требаше повторно да биде отворен денеска по тридневен прекин на испораките поради одржување. Но, во последен момент, компанијата рече дека е пронајден технички проблем и дека цевката не може повторно да работи додека не се поправи. Европската унија соопшти дека „Гаспром“ користи на „лажни изговори“, а „Сименс енерџи“, компанија која ги произведува турбините на гасоводот, рече дека техничкиот проблем кој го пронашол „Гаспром“ не го оправдува намалувањето на гасот.
Прекинот на испораките е огромен удар за Европа, која се бори да ја намали зависноста од рускиот гас пред зимата и ги чека следните чекори на Москва во енергетската војна. Додека континентот се обидува да спроведе мерки за да ја преброди зимата, неодреденото затворање на гасоводот е ескалација што се заканува со поголеми економски превирања.
„Оваа објава е само уште еден показател дека помеѓу „техничките прашања“ и „несогласувањата во договорите“, зима со нула руски гас е централното сценарио за Европа“, рече Симоне Таљапитра од тинк-тенкот „Бројгел“ во Брисел.
Тој додаде дека „Путин се обидува да ја погоди Европа онаму каде што најмногу боли“.
Со цените четири пати повисоки од пред една година, гасната криза веќе принудува затворање на европската индустрија и го поткопува еврото.
Инаку,„Гаспром“ соопшти дека е откриено истекување на нафта кај гасната турбина што помага да се испумпува гасот и нема индикации колку долго може да трае поправката. Слични истекувања на нафта беа претходно откриени и кај некои други турбини, кои сега не се во функција, а „целосно отстранување на истекувањето на нафтата на овие турбини е можно само доколку се вклучи специјализирана компанија за поправка“, соопшти „Гаспром“.
Неколку часа претходно, Г-7 објави дека планира да спроведе ограничување на цената на глобалното купување на руска нафта.
Европа ги полни складиштата, прилагодувајќи се на реалноста на ниските руски текови. Сепак, ситуацијата може да се влоши кога ќе се намалат залихите, особено поблиску до крајот на грејната сезона или ако во Европа има силен студен бран.
Драматичната ескалација на енергетската криза во Европа доаѓа токму кога цените се намалуваа. Ако исклучувањето продолжи, тоа ги става домаќинствата, фабриките и економиите во опасност, слабеејќи ја Европа во поддршката на Украина во војната против Русија.
Москва веќе драстично ги намали испораките на гас во текот на изминативе месеци. Упатените во Кремљ рекоа дека Москва ги користи намалувањата на снабдувањето за да го зголеми политичкиот притисок кон европските лидери во обид да ги принуди да ја преиспитаат својата поддршка за Киев.
Целосното запирање на „Северен тек“, кој минува под Балтичкото Море до Германија, ќе остави само две главни рути кои ја снабдуваат Европската унија со гас: едната преку Украина и „Турски тек“ преку Црното Море. Спречени се и протокот низ Украина, додека „Турски тек“ кон југот на Европа работи без пречки.
Германија, која со децении создаваше зависност од евтиниот руски гас, сега се обидува да ја преуреди својата енергетска политика за само неколку недели за да ја заштити својата моќна економија. Министерот за економија Роберт Хабек оваа недела рече дека земјата воопшто не може да се потпре на Русија за гас.
„Веќе ја видовме несигурноста на Русија во изминатите неколку недели и соодветно, непоколебливо и доследно ги продолживме нашите мерки за зајакнување на независноста од рускиот увоз на енергија“, соопшти Министерството за економија доцна во петокот.
Безбедноста на снабдувањето е загарантирана, соопшти Министерството.
ЕУ размислува за интервенции без преседан на енергетскиот пазар, вклучувајќи ограничувања на цените, намалување на побарувачката на електрична енергија и неочекувани даноци на добивката. Тие дискусии помогнаа да се намалат цените оваа недела.
Блокот, исто така, се обидува да се подготви за ризикот од прекин на рускиот гас со надополнување на резервите и обезбедување на алтернативни испораки како што е течен природен гас од САД.
„До снабдувањето е тешко да се дојде и станува се потешко и потешко да се замени гасот што не доаѓа од Русија “, рече Џејкоб Мендел, виш соработник за стоки во Aurora Energy Research Ltd.
.webp){kind=icon}
