Европа може да остане без гас сред зима ако се затвори „Северен Тек“

Европа ризикува да остане без залихи на природен гас среде шпицот на зимската побарувачка доколку снабдувањето на Русија преку критичниот гасовод целосно престане, сметаат од консултантската куќа „Wood Mackenzie Ltd“.

Во најлошото сценарио кое предвидува целосно затворање на гасоводот „Северен тек“,  кон Германија, Европа нема да успее да го достигне нивото на складирање што Европската унија го нареди до почетокот на грејната сезона во ноември. И регионот може целосно да остане без залихи до јануари, укажа Масимо Ди Одоардо, потпретседател за истражување на гас и ЛНГ во „WoodMac“.

„Дури и ако се земат предвид контра-мерките, можеби е неизбежно да се изврши одредено рационализирање на побарувачката“, предупреди Ди Одоардо.

Во потег што ги разбранува енергетските пазари и поттикна нов раст на цените, рускиот гасен гигант „Гаспром“ ги намали испораките на клиентите во Италија, Германија, Франција и Австрија. Извозникот рече дека мора да го ограничи капацитетот на гасоводот „Северен тек“ преку Балтичкото Море поради проблеми со поправките на турбините произведени од „Siemens AG“. Но, Германија го оспори тоа, нарекувајќи ги намалувањата „политички мотивирани“ и насочени кон вознемирување на пазарите.

Доколку намалениот доток од Русија продолжи подолго време може да ја попречи кампањата за полнење на летните складишта токму во моментот кога залихите се опоравуваа, зголемувајќи го оптимизмот дека регионот ќе ја достигне целта на ЕУ од минимум 80 отсто ниво на полнење пред 1 ноември.

Целосното запирање на протокот на „Северен тек“ ќе ги доведе нивоата на складирање во Европа на само 59 отсто до 1 ноември, рече Ди Одоардо.

„Ако гасоводот продолжи да работи со само 40 отсто од својот капацитет, тогаш нивото на складирање би можело да достигне 67 отсто дотогаш, со ризик од исцрпување на залихите само до крајот на зимата. Но, ако гасоводот се врати во нормална работа, тогаш е можно да се пополнат местата за складирање до 80 отсто до 1 ноември, дури и во услови на тековен продолжен прекин во „Freeport LNG“, американска фабрика за втечнување гас“, рече Ди Одоардо.

ЛНГ игра клучна улога од почетокот на годината бидејќи Европа увезува рекордни количини на гориво, особено од САД.

„Приливот на ЛНГ претежно поттикнат од зголемениот извоз на САД, останува клучен лост за неутрализирање на намалените нивоа на гас од Русија и доведе до речиси целосно закрепнување кон историските нивоа на складирање на гас додека влегуваме во летото“, рече Патрисио Алварез, енергетски аналитичар на „Bloomberg Intelligence“. 

Тој додаде дека сепак, огромната нестабилност на цената на гасот поради проблемите со снабдувањето на Русија и стеснувањето на глобалното снабдување со ЛНГ веројатно ќе доведат до поголемо складирање, што може дополнително да се забрза во зависност од летните временски услови.

Во најлошото сценарио, „сигурно ќе се увезе повеќе ЛНГ, иако тоа ќе биде ограничено од можностите за складирање кои се блиску до полн капацитет“, рече Ди Одоардо.

Според него, тоа ја отвора можноста дека може да биде потребна некаква форма на рационализирање на побарувачката.