Комплетирањето на договорот за изградба на коридорите 8 и 10 Д со конзорциумот „Бехтел и Енка“, министрите од ДУИ го прославија играјќи фудбал на мали голчиња во холот на Министерството за политички систем. Сега се прашувам како ќе слават кога патиштата ќе бидат готови. Имаме ние искуство со вакви изблици на задоволство. За пуштањето во употреба на автопатот Демир Капија - Смоквица, власта викна трубачи. Свиреа луѓето во тунелот кај Демир Капија.
Дел од тимот што дриблаше во министерскиот хол беше и Фатмир Бесими, министерот за финансии што претходниот ден, од втор обид, успеа да ја запише обврзницата потребна за отплата на стари долгови. Има што да се слави во овој случај, инвеститорите ни се заблагодарија што за ист ризик им даваме повеќе пари.
Фејсбук-профил на Артан Груби, потпретседател на Владата
Инфлацијата повторно ја обележи неделата. Забави трендот на раст, па стапката изнесува 16,7 проценти во февруари во однос на истиот месец лани, што, пак, е мало намалување во однос на претходниот месец. Лани во февруари инфлацијата изнесувала 7,6 отсто, а потоа забрза. Сега секој следен месец ќе гледаме постепено намалување на стапката, која се споредува со високите стапки од минатата година.
Значи, намалувањето на инфлацијата нема врска со мерките на Владата, затоа што, како што вели поранешниот министер за финансии и гувернер Петар Гошев, мерките на Владата се метеж што создава притисоци на пазарот. И така се влегува во инфлаторна спирала, во која поголем дел од земјите веќе се вртат.
Храната е скапа, ама за автомобили има пари. За нови не, купувањето во овој случај се одложува, но за стари од Германија никогаш немало проблем. Македонците навалија на автомобилите што оваа западноевропска земја почнува да ги забранува затоа што се загадувачи.
Го анализиравме работењето на берзата од почетокот на година. Новите правила ги направија дивидендите неатрактивни поради високите каматни стапки и затоа компаниите се свртеа кон откуп на сопствени акции.
Пишувавме и за индустријата. Земјава е единствена во регионот каде што лани имало пад на производството, а проблемите не застануваат. Освен неизвесноста со цената на струјата, сè повеќе натежнува и недостигот од работници во секторот.
Неделава го одбележивме и 8 Март. Нееднаквоста скапо нè чини и тоа ќе биде така сè додека седокосиот маж се смета за елегантен, а седокосата жена е етикетирана, а сите старееме - со или без козметика.
.webp){kind=icon}
