Маск, Рубини и „Голдман Сакс“ сложни дека расте ризикот за рецесија

Илон Маск, Нуриел Рубини и „Голдман Сакс“ предупредија на зголемената веројатност американската економија да западне во рецесија.

Нивните предвидувања ќе ги поттикнат стравувањата од тешко приземјување на најголемата светска економија откако Федералните резерви ги зголемија каматните стапки за да се спротивстават на најбрзото темпо на инфлација во последните децении.

Главниот извршен директор на „Тесла“, Маск изјави дека рецесија во САД изгледа веројатна во блиска иднина.

„Рецесијата е неизбежна во одреден момент. Што се однесува до тоа дали ќе има рецесија во блиска иднина, тоа е поверојатно отколку не“, рече Маск во интервју со главниот уредник на „Блумберг“, Џон Миклетвејт во рамките на Катарскиот економски форум во Доха.

„Тоа не е сигурно, но се чини дека е поверојатно отколку не“, рече Маск.

Најбогатиот човек на светот на почетокот на овој месец им кажал на директорите на „Тесла“ дека има „супер лошо чувство“ за економијата, се вели во интерна е-пошта што ја видел „Ројтерс“.

Економистите на „Голдман Сакс“ ги намалија прогнозите за раст на САД и предупредија дека ризикот од рецесија се зголемува.

Тимот на „Голдман“ гледа 30 проценти веројатност за влегување во рецесија во текот на следната година, од 15 проценти претходно, и 25 проценти условна веројатност за влегување во рецесија во втората година, доколку се избегне во првата. Тоа подразбира 48 проценти кумулативна веројатност во следните две години наспроти 35 проценти претходно.

„Сега го гледаме ризикот од рецесија како повисок и пооптоварен“, напишаа економистите предводени од Јан Хациус.

„Главните причини за тоа се што нашата основна патека на раст сега е пониска и сме сè позагрижени дека ФЕД ќе се чувствува принуден да одговори силно на високата вкупна инфлација и очекувањата за потрошувачката инфлација доколку цените на енергијата дополнително се зголемат, дури и ако активноста нагло се забави“, укажаа од „Голдман Сакс“.

Во својот изглед, Рубини рече дека очекува рецесија на САД до крајот на годината.

„Мерките на довербата на потрошувачите, продажбата на мало, производната активност и домувањето нагло забавуваат додека инфлацијата е висока. Ние сме многу блиску“, изјави Рубини.

Настојувајќи да го смири порастот на трошоците за живот, ФЕД ја забрза својата кампања за затегнување на монетарната политика минатата недела со своето најголемо зголемување на каматните стапки од 1994 година. Тоа доведе до нови загуби на „Волстрит“ и ги зголеми шансите за рецесија, зголемувајќи го притисокот врз претседателот Џо Бајден.

Бајден во понеделникот повтори дека рецесијата на САД не е „неизбежна“ по разговорот со поранешниот министер за финансии Лери Самерс, кој гледа значителна шанса земјата да се бори со стагфлација.

 

Во моментов нема коментари за веста. Биди прв да коментира...

Остави коментар