Спа и планинарење стануваат тренд, ви одбравме места во Македонија

Плажа, езеро или море, активностите и рекреацијата на вода нема никогаш да излезат од мода, но одморите одамна станаа нешто повеќе од само „печење на сонце“. Луѓето сè повеќе се „гладни“ за невообичаен одмор, за алтернативни дестинации, за нови активности и поинакви уживања.

Параглајдери, јавање коњ, планинарење, спа-уживање, археолошки локалитети се само дел од понудите што се сè повидливи во каталозите на туристичките агенции, а интересот за нив станува сè поголем и туристите често се подготвени за тоа да одвојат повеќе пари, дури и ако станува збор за помалку денови одмор.

Фокусот на туристите е променет, но Македонија заостанува со понудите

Според директорот на Агенцијата за промоција и поддршка на туризмот, Љупчо Јаневски, новата туристичка реалност по пандемијата значително ги измени интересот и фокусот на туристите кон зелениот концепт со одржливост на дестинациите, одговорното патување и сè поголемиот фокус и интерес кон спа-туризмот и грижата за своето здравје.

„Доколку треба да се детектираат капацитетите што ги има македонскиот туристички сектор на ова поле, во најмала рака би ги оценил како скромни и повеќе фокусирани на медицинскиот дел, додека можностите и природните капацитети како доста добри поради големиот број неискористени термални извори. Понудата во овој момент е мала и заостанува зад регионот, кој треба да ни биде пример за развој и позиционирање во туристичката понуда на оваа многу значајна форма“, вели Јаневски, според кого очигледно изостануваат  инвестиции во овој туристички сегмент.

Љупчо Јаневски, директор на Агенцијата за промоција и поддршка на туризмот
Фото: Агенција за промоција и поддршка на туризам

 

„Што поскоро е потребно да се овозможат услови од страна на државата со законски измени, урбанистички и просторни планови, и сето тоа поткрепено со државна стратегија за спа-туризмот. На овој начин ќе се охрабрат инвеститорите да покажат интерес и да инвестираат во спа-туризмот, кој овозможува голем број предности, бидејќи е активен во текот на дванаесет месеци, намалувајќи ја сезоналноста во дестинацијата, а зголемувајќи ја одржливоста на дестинацијата“, вели директорот на Агенцијата за промоција и поддршка на туризмот.

Врвните хотели ја започнаа годинава како претпандемиската 2019-та

Во недостиг од конкретна статистика за спа-туризам, ако како репер ги земеме хотелите со пет и четири ѕвезди, кои главно нудат и спа-уживање, тогаш може да констатираме дека првото тримесечје годинава започна подобро од истиот период лани и е на исто ниво од претпандемиската 2019 година. Имено, според податоците од Државниот завод за статистика, во периодот јануари-април годинава хотелите со пет и четири ѕвезди во земјава угостиле 147.940 посетители, кои отседнале вкупно 263.111 ноќи. За споредба, во првите четири месеци од 2019 година овие хотели угостиле речиси 9.500 туристи повеќе, или вкупно 157.508, а бројот на ноќевања бил поголем за скоро 17.000, односно биле реализирани 280.345 ноќевања.

Споредено со почетните четири месеци од 2022 година, оваа година започна со значително повисоки бројки, односно бројот на гости во луксузните хотели е зголемен за речиси 27,6 проценти (од јануари до април лани имало 115.935 гости), а бројот на ноќевања за 18,8 отсто (во разгледуваниот период лани се реализирани 221.396 ноќевања во хотели со пет и четири ѕвезди).

Директорот на Агенцијата за промоција и поддршка на туризмот е уверен дека ако стратегиски се развива овој туристички сегмент во Македонија, истиот тој на годишно ниво ќе ги зголеми ноќевањата за 10 проценти.

„Тоа во сегашни бројки би изнесувало 300.000, кои мултипликативно ќе влијаат врз нови работни места, локален економски развој и зголемување на процентот на бруто-домашниот производ од туризмот во македонската економија“, вели Јаневски.

Што се нуди во Македонија?

Во овој текст нудиме повеќе предлози за алтернативен одмор и несекојдневно уживање, а започнуваме со една интересна понуда од ранчот „Шерпа“, кој се наоѓа на околу еден километар оддалеченост од познатото село Галичник, на 1.500 метри надморска височина. Место опколено со речиси недопрената природа на националниот парк Маврово.

Семејната премиум кампинг-понуда на ранчот „Шерпа“ со јавање коњи се однесува на две ноќевања, по цена од 270 евра по лице. Притоа, понудата вклучува вкупно јавање од седум часа за двата дена, со претходна едночасовна обука за јавање и безбедност. Ранчот обезбедува сè што е потребно за посетителите, од заштитни шлемови и штитници за грб до комплетна опрема за кампување (шатори, вреќи за спиење, душеци). Во цената се вклучени сите оброци и пијалаци во кампот, како и презентација на стари земјоделски техники.

Фото: Интернет-страница на „Шерпа“

 

Јавачката експедиција е патување на коњ, кое може да донесе низа тешкотии, но истовремено обезбедува искуство за паметење и невообичаена глетка.

Како што се напоменува, овој тип екскурзија овозможува уживање со семејството или пријателите во квалитетно време минато на планина, далеку од модерната цивилизација, со несекојдневни активности.

Возејќи по угорнини и по долини (во цената на располагање добивате и логистичко возило) на планината Бистра, поставувајќи кампови длабоко во планините, ќе уживате во огромниот и бескраен отворен поглед кон многу планински врвови. На ова патување ќе се приближите до овчарскиот живот, бидејќи ќе посетите неколку фарми за овци, ќе го искусите традиционалниот начин на правење сирење и едноставно ќе уживате во природата.

„Блумберг Адрија“ одбра и неколку поинтересни понуди за спа-уживање во земјава:

* „Аурора ресорт и спа“ (Aurora Resort & Spa), Берово

„Велнес и спа-центарот во 'Аурора ресорт' е хармонично дизајнирано место, кое содржи избор од содржини и услуги обезбедувајќи сè за ваша потполна релаксација“, порачуваат од хотелскиот комплекс со пет ѕвезди, кој располага со внатрешен затоплен базен, сауна, парна бања, џакузи и соба за релаксација и медитирање со можност за освежување. На гостите им се нуди и избор на масажи од професионален физиотерапевт.

Спа-центарот не е достапен ако сакате да го посетите овој комплекс само за таа намена. Услугите од спа им се на располагање само на гостите што престојуваат во комплексот, и тоа најмалку две ноќи. Најчесто може да се најдат промотивни пакети, кои се на база на полупансион, што вклучува појадок и вечера и еден час дневно бесплатно користење на спа-центарот, односно на затоплениот релаксирачки базен, парната бања и сауната, секако со претходна резервација.

Фото: Интернет-страница на „Аурора“

 

Најевтината опција за ова задоволство ќе ве чини 109 евра за две ноќи по лице, ако престојувате во деновите од недела до четврток, односно 126 евра ако тоа е за време на викенд-деновите. Најскапиот пакет, пак, во зависност од тоа која соба се користи, чини 171, односно 189 евра во викендите.

Постои и луксузен џакузи вила-апартман, кој е достапен за 538 евра за две ноќи од недела до четврток, односно за 606 евра за две ноќевања од петок до недела, а цената во случајов се однесува на четири лица.

Ресортот се наоѓа во планинскиот дел на истокот од Македонија, блиску до градот Берово, веднаш зад Беровско Езеро и прекрасниот кањон на Малешевските Планини.

* „Пеинт ит блек хотел“ (Paint it Black Hotel), Гевгелија

„Пеинт ит блек“ е само неколку години стар хотел со четири ѕвезди, кој се наоѓа во Гевгелија, блиску до границата со Грција, и нуди пристојни цени. За релаксација хотелот нуди спа и велнес-центар.

Фото: Интернет-страница на „Пеинт ит блек“

 

Во овој хотел може да се користи спа и велнес-центарот без обврска да се престојува во комплексот, но секако задолжителна е претходна резервација. Цената е 1.200 денари (речиси 20 евра) по лице за три часа користење на услугите. Притоа, на располагање се парна бања, финска и турска бања, џакузи, топли кревети и солена соба.

* Хотел „Мериот“ (Skopje Marriott Hotel), Скопје

Хотелот се наоѓа на самиот централен плоштад во главниот град. Како дел од групацијата „Мериот“, и овој хотел нуди низа услуги, меѓу кои неизбежно и можност за релаксација со спа и велнес-центар.

Фото: Интернет-страница на хотелот „Мериот“ - Скопје

 

Цената за користење на спа-центарот, каде што на располагање има и парна бања, е 2.300 денари за два и пол часа и за тоа не треба претходна резервација, а може да го користите и ако не сте гостин на хотелот. Закажување е потребно само доколку сакате некоја од многубројните масажи што ги нуди хотелот.

* „Гарден спа“ (Garden Spa), Скопје

Хотелот „Гарден спа“ се наоѓа во центарот на Скопје, но во подножјето од планината Водно. Во рамките на својата понуда за релаксација и спа, хотелот нуди џакузи, финска сауна, турска и парна бања. Услугите се достапни и за лица што не престојуваат во хотелот, а цената е 1.500 денари (околу 25 евра) за два часа, односно 1.000 денари (околу 16 евра) за ист толкав период доколку се користи само сауната. Масажите што се нудат тука се навистина многубројни, а цените за тие задоволства почнуваат од 900 денари (15 евра), па до 3.200 денари (52 евра).

Фото: Интернет-страница на „Гарден спа“

 

Како необична понуда од овој хотел ја издвојуваме винската бања со винска масажа, за што треба да платите 3.900 денари (речиси 65 евра), а целосен вински третман, кој опфаќа капење во вино, пилинг и масажа, е услуга достапна за 4.900 денари (околу 80 евра). На интернет-страницата на хотелот пишува: „Го промовираме најдоброто од нашата стара виноградска култура и модерните трендови на нашето време“. Оттаму велат дека ексклузивната винска терапија е достапна само во три држави во Европа, меѓу кои и Македонија.

* „Инекс Олгица хотел и спа“ (Inex Olgica Hotel & Spa), Охрид

Хотелот со пет ѕвездички постои половина век на крајбрежјето од Охридско Езеро. Лоциран е веднаш крај брегот од езерото, на патот кон Свети Наум, на четири километри од Охрид.

Фото: Интернет-страница на „Инекс Олгица“

 

Во рамките на својата понуда за релаксација нудат топол базен, џакузи, топли лежалки, сауна и турска бања. Нема услов дека мора да сте гостин на хотелот за да ги користите овие услуги, а цената навистина е привлечна, особено што станува збор за хотел во најголемиот туристички центар во земјава. За само 900 денари (нешто помалку од 15 евра) може без ограничување да го користите спа-центарот во хотелот, секако во рамките на работното време.

* Хотел „Тино“ (Hotel Tino), Охрид

Уште еден избор за спа-уживање во туристичкиот бисер на Македонија е хотелот „Тино“, кој е лоциран веднаш до градското шеталиште, на самиот брег од Охридско Езеро, а во центарот на градот Охрид.

Фото: Интернет-страница на хотелот „Тино“

 

Нивната понуда за релаксирање вклучува џакузи, сауна и парна бања, кои првично се наменети за гостите на хотелот. Но доколку нема голем интерес или хотелот не е преполн, може да ги користите овие услуги и како клиент однадвор, со тоа што цената е 1.000 денари (околу 16 евра) за два часа.

* „Радика хотел и спа-ресорт“ (Radika Hotel & SPA resort), Маврово

Хотел со пет ѕвездички, кој важи за првокласно планинско одморалиште, лоцирано во националниот парк Маврово во Западна Македонија. Раскошната околна природа е дополнета со услуги за внатрешно уживање додека сте во хотелот, па на располагање има сауна, џакузи и базен со топла солена вода.

Фото: Интернет-страница на „Радика хотел и спа“

 

Доколку не е преполн хотелот, овие услуги се достапни и за надворешни посетители. За цена од 30 евра ќе може да уживате четири часа во овие хотелски простории за одмор и релаксација.