Недостиг од железо ја мачи македонската челична индустрија

Декарбонизацијата во индустријата за производство на челик ги остави челичарниците без доволно количество старо железо. Глобалната цел на челичарниците, конвенционалниот начин на производство на челик, кој се произведува со користење јаглен и железо, да го заменат со производство на таканаречен зелен челик, кој се добива со користење водород како енергетско гориво, ја зголемува употребата на старо железо.

Некои од македонските челичарници веќе почнуваат да го чувствуваат недостигот од старо железо на пазарот.

„Се соочуваме со недостиг и тешкотии да се најде старо железо на традиционалните пазари од кои купуваме. Токму тоа ќе биде проблем, поточно во квалитетот на старото железо како основен репроматеријал за нашето производство. Голем дел челичарници што работат со високи печки, сакајќи да преминат кон зелен челик, ќе се префрлат кон електрични печки, а за овој тип е неопходна поголема употреба на старо железо.“, велат од „Макстил“.

Bloomberg Mercury

Доколку продолжи трендот на недостиг од старо железо, може да се очекува зголемување на цените на крајните производи во овој сектор. Инаку, најголеми извозници на старо железо во земјава се Бугарија, Грција и Албанија.

Во 2022 година во земјава биле увезени 172 милиона килограми старо железо, во вредност од 60 милиони евра. Вкупниот увоз на железо во последните пет години бележи пад.

Челичната индустрија како дел од вкупното производство на метали учествува со речиси 6 отсто во индустриското производство. Претходната година овој сектор имаше рекорден пад на производството каков што не е забележан од 2009 година.

И челичарниците во Европската Унија бележат пад на производството во последните пет години. Според последниот извештај на европската асоцијација на челик „Еурофер“, децениската смена од високите печки на јаглен, војната во Украина и лошата прогноза за побарувачката се сериозни негативни фактори за оваа индустрија. Во првиот квартал од годинава потрошувачката на челик е намалена за 11,7 отсто, а најголем пад од 19,3 отсто беше регистриран во четвртиот квартал во 2022 година. Се очекува дека во втората половина од годинава и почетокот на 2024 година би можело да има подобрување.

Во текот на 2022 година глобалното производство на челик падна на 1,9 милијарда тони, што е за 4,2 отсто помалку од една година порано според податоците на светската унија за челик „Ворлдстил“ (Worldsteel). Десет од најголемите светски производители на челик забележаа пад на производството. Кина, најголемиот светски производител на челик, забележа пад на производството за 2,1 отсто.

Во првата половина од 2023 година глобалното производство бележи пад од 1,1 отсто. Прогнозата на „Ворлдстил“ е дека оваа година побарувачката на челик ќе бележи раст од 2,3 отсто, додека во 2024 година ќе има раст од 1,7 отсто. Сепак, дали ќе се остварат очекувањата за закрепнување на челичната индустрија многу ќе зависи од тоа дали ќе има натамошното затегнување на монетарната политика и раст на каматите, што би влијаело на трошоците кон зелената транзиција, и како ќе се развиваат геополитичките тензии, пред сè во Украина. 

Во моментов нема коментари за веста. Биди прв да коментира...

Остави коментар