Доволен 2 за македонската економија годинава, не и според Владата

Европската банка за обнова и развој (ЕБОР) ја потврди претходната прогноза според која македонската економија годинава ќе порасне за два отсто.

„Растот се предвидува да остане скромен, од 2 отсто, во 2023 година, бидејќи се очекува надворешната побарувачка да остане слаба, а мерките за ограничување на инфлацијата ќе влијаат врз потрошувачката на домаќинствата“, се наведува во најновиот извештај на банката за регионални економски перспективи на ЕБОР.

Податоците во извештајот се засновани на растот на економијата од 2,1 отсто во првиот квартал од оваа година. Неодамна државната статистика објави дека БДП во вториот квартал се намалил и изнесува 1,1 отсто.  

ЕБОР прогнозира дека македонскиот БДП ќе забрза до три отсто во 2024 година, што ќе се должи на очекуваното глобално закрепнување.

Македонија и БиХ со најнизок раст во регионот на Западен Балкан

Според ЕБОР, растот на економската активност во земјава ќе остане скромен главно од две причини. Првата е потрошувачката.

„И покрај натамошното зголемување на минималните плати од април 2023 година, зголемувањето на пензиите и ограничувањата на цените на некои основни производи, побарувачката на домаќинствата ќе остане придушена во 2023 година, бидејќи високите нивоа на инфлација ги намалуваат реалните приходи“, се истакнува во извештајот.

Втората причина за скромниот раст е кризата кај странските партнери, особено кај најголемата европска економија, Германија, која според Европската комисија ќе биде единствена голема економија во Европа што ќе доживее контракција во текот на 2023 година. Токму оваа земја е најголем трговски партнер на Македонија.

„Економското забавување на главните трговски партнери ќе се одрази на извозот, додека зголемената неизвесност и заострените услови за финансирање може да влијаат на довербата на инвеститорите“, се наведува во извештајот на ЕБОР за земјава.

Според проекциите на Банката за регионот на Западен Балкан, од земјава понизок раст ќе има единствено Босна и Херцеговина.

ЕБОР очекува економскиот раст на регионот на Западен Балкан годинава да забави до два отсто, а следната година да стигне до 3,4 отсто.

„Во Западен Балкан ефектот од слабеењето на трговската размена со партнерите од еврозоната на почетокот на 2023 година беше делумно неутрализиран со силните перформанси на туристичкиот сектор во економиите на регионот базирани на услуги“, се наведува во извештајот.

Проекциите на Владата се најоптимистички

Проекцијата на ЕБОР за раст на БДП до два отсто во текот на оваа година е меѓу најпесимистичките.

Светската банка прогнозира дека во 2023 година растот ќе изнесува 2,4 отсто, што е повеќе од проекцијата на Народната банка (2,1), и најблиску до владината проекција за раст од 2,5 отсто (првичната проекција на Владата за оваа година изнесуваше 2,9 отсто, но беше ревидирана).

Светската банка предвидува дека целиот регион на Западен Балкан годинава ќе ја заврши со економски раст од 2,6 отсто. Клучни фактори што влијаат на економските перспективи се влијанијата од војната во Украина, пониската лична потрошувачка, заострените глобални финансиски услови и послабата побарувачка во еврозоната.

Според владините проекции содржани во најновата фискална стратегија, до 2025 година БДП ќе стигне до пет отсто.

Аналитичарите на „Блумберг Адрија“ во последната макроанализа прогнозираат дека сите земји од регионот Адрија ќе избегнат рецесија во текот на оваа година, а земјава ќе има повисок раст на БДП од Словенија и Хрватска.

Кога станува збор за 2024 година, нашите аналитичари очекуваат забрзување на растот на БДП во сите земји од регионот Адрија, освен во БиХ, каде што се предвидува економски раст еднаков на годинешниов.

Ваквите прогнози ги базираат на очекувањата за зајакната лична потрошувачка во услови на забавување на инфлацијата. Како фактори што би можеле да придонесат кон дополнителна поддршка на растот ги наведуваат закрепнувањето на странската побарувачка и реалната можност зимата 2023/2024 година да помине без нови енергетски шокови.

 

Во моментов нема коментари за веста. Биди прв да коментира...

Остави коментар