Германија бавно ќе закрепнува: Колку тони тежи тоа во македонски мерки

Германската економија годинава ќе ја заврши во негатива, а според последниот извештај на Европската комисија таа ќе биде единствената голема економија во Европа што ќе доживее контракција во текот на 2023 година.

Прогнозите од различни извори што се достапни на терминалот на „Блумберг“ покажуваат иста тенденција, моторот на европската економија ќе се стабилизира дури за две години отсега, но и тогаш ќе биде далеку од достигнувањата што ги имаше пред почетокот на енергетската криза лани.

Проекциите на германската „Дојче банк“ покажуваат дека БДП ќе се искачи на 1,3 отсто во 2025 година,  економистите на „Блумберг“, пак, се попесимистични - нивната прогноза е дека во 2025 година растот во земјата ќе стигне до еден отсто.

Македонија е особено зависна од здравјето на германската економија. Тоа најдобро се гледа од последните податоци за македонскиот БДП во вториот квартал од оваа година. Растот изнесува само 1,1 отсто, што е намалување во однос на претходниот квартал.

Колку долго ќе трае закрепнувањето на Германија?

Најголем дел од македонскиот извоз завршува во Германија, а од него најголем дел се делови за автомобилската индустрија што се произведуваат во германските фабрики во земјава.

Во јули нарачките на германските фабрики, според тамошната статистика, се намалиле за 11,7 отсто, по што претседателката на Германското здружение за автомобилска индустрија, Хилдегард Милер, предупреди дека Германија е во опасност да го загуби долгогодишниот статус на светска суперсила во автомобилската индустрија.

Влошување на ситуацијата покажуваат и податоците на институтот ИФО, а „Блумберг“ ја пренесува изјавата на Анита Волф, експертка за индустриска организација и нови технологии, според која „чувството најмногу се влоши кај производителите на автомобили, додека доставувачите сè уште се доста задоволни од својата моментална позиција“.

Статистичките податоци покажуваат дека во 2021 година увозот и извозот во земјата се изразувале со високи едноцифрени проценти, а таков тренд не се гледа до 2025 година.

Прогнозите за индустриското производство во земјата, пак, покажуваат дека до 2025 година Германија ќе се врати на нивото од 2017 година.

Каква е состојбата во германските фабрики во земјава?

Сите случувања во германската автомобилска индустрија мора да остават белег и на домашните компании, вели во изјава за „Блумберг Адрија“ директорот на фабриката „ОДВ електрик“ од струшката зона, Огнен Цубалевски. Но во овој момент во компанијата со која тој раководи нема никакви проблеми во однос на нарачките од Германија.

„Во овој момент немам еднозначен одговор на ова прашање. Падот на нарачките афектира некои компании повеќе, некои помалку. Освен движењата во германската автомобилска индустрија, друг релевантен фактор е и т.н. деглобализација (регионализација) на синџирот на доставувачи во светот. Во случајот со ’ОДВ електрик Македонија’, ние не само што немаме пад на нарачките туку имаме и рекордно големи нарачки од страна на нашите клиенти“, вели Цубалевски.

За периодот што следува, Цубалевски вели дека се неминовни сериозни придвижувања на пазарот, затоа што доаѓа до масовно поместување на технологијата, од мотори со внатрешно согорување, преку хибридни погони, па до целосно електрични возила. Според него, поместувањата на технолошко ниво се проследени и со поместувања на географската локација на производство на возилата.

Огнен Цубалевски, менаџер на „ОДВ електрик“ од Струга

„Во моментов околу 50 отсто од сите новопродадени електрични возила се произведени во Кина. Таа земја има контрола и врз целиот критичен синџир на доставувачи за овие возила, од производството на батериите, преку електрониката и корисничкиот интерфејс (user interface), па до вештачката интелигенција и автономното возење. Во случај да се задржи овој тренд, кинеските производители на возила не само што ќе им го земат пазарот на германските туку со себе ќе ги повлечат и сопствените поддоставувачи од Азија. Се разбира, сето ова може да се промени прекуноќ ако дојде до технолошки пробив на двигателите (моторите) на водороден погон. Во моментов нема назнаки во тој правец“, вели Цубалевски.

И од германската комора (АХК) во земјава велат дека засега нема негативни трендови во размената меѓу Германија и Македонија. Според податоците на Заводот за статистика на Сојузна Република Германија, кои ни ги доставија од АХК, заклучно со јули извозот од Македонија се зголемил за 4,6 отсто, а увозот останал стабилен како и во 2022 година.

„До нас не се пристигнати информации дека се очекува намалување на трговската размена помеѓу Германија и Северна Македонија. Германските инвеститори во земјава работат на долгорочни проекти и договори, кои се потпишуваат со компании доставувачи на повеќе години. Од нив исто така немаме најави дека очекуваат намалување на нарачките“, изјави за „Блумберг Адрија“ директорката на АХК, Антје Ванделт.

 Антје Ванделт, директорка на АХК

Таа додава дека лани имало и зголемување на инвестициите кај голем број од германските инвеститори во земјата, „а некои од нив планираат да префрлат и поголем дел од  производството во Северна Македонија“.

Извозот од земјава под притисок

За разлика од лани, кога извозот бележеше позитивни бројки, во вториот квартал годинава тој е во негатива. Иван Одрчиќ, шеф на тимот за анализа на макроекономијата и на пазарите на капитал на „Блумберг Адрија“, вели дека трговската размена во земјава во првата половина од годината била „под притисок на послабата странска побарувачка, но и на релативно високите стапки на раст минатата година, односно базниот ефект“.

Послабата побарувачка за македонски производи, според Одрчиќ, се должи на слабеењето на економската активност кај главните трговски партнери, а трендот ќе продолжи до крајот на годината.

Иван Одрчиќ, шеф на тимот за анализа на макроекономијата и на пазарите на капитал на „Блумберг Адрија“

„Поради натамошното забавување на економијата на Европската Унија и послабата лична потрошувачка, очекуваме дека трговската размена ќе се движи во намален обем до крајот на оваа година во однос на движењата во првата половина на 2023 година, но делумно и поради високата основа во деветтиот, десеттиот и единаесеттиот месец од 2022 година. Во 2024 година очекуваме намалување на инфлациските притисоци, а веќе во вториот квартал од годината ќе дојде до враќање на реалниот раст на платите, а сето тоа ќе го поддржи увозниот потенцијал и, исто толку важно, очекуваме забрзување на странската побарувачка, што ќе доведе до подобар извозен потенцијал“, завршува Одрчиќ.

Во моментов нема коментари за веста. Биди прв да коментира...

Остави коментар