За колку ќе поскапи увозот на половни возила?

Владата на седницата во вторник ќе го утврди новиот начин за пресметка на данокот на моторни возила. Пред тоа, во понеделник на средба ги повикува претставниците на коморите кои увезуваат вакви автомобили со цел да се извршат консултации за новата Уредба.

Ова не е прва средба на коморите во врска со оваа уредба. „Блумберг Адрија“ уште во јануари пишуваше дека Царината остварила средба со претставници на комората кои се увозници на половни возила и дека на средбата се разговарало за измени во уредбата со која се зголемуваат давачките за увоз.

„Царинската управа подготвува измена на уредбата за начинот на пресметка на данокот на моторни возила, бидејќи во согласност со новата регулатива на ЕУ за возилата произведени од 2022 година се применува нов метод за пресметка на количеството на емисија на CO2, прикажан во потврдата за сообразност“, ни рекоа од Царина пред девет месеци.

„Износот на данокот на моторни возила ќе се пресметува како и досега, врз основа на вредноста на возилото и на емисијата на CO2, изразен во потврдата за сообразност, која увозниците ја приложуваат при царинењето“, рекоа од Управата.

 

Блумберг Адрија

Постојниот Закон за данок на моторни возила беше донесен во декември 2019 година, а почна да се применува на 1 јануари 2020. Со него за првпат беше воведена давачката за постарите моторни возила што испуштаат поголеми количества јаглерод диоксид (СО2) во воздухот и со тоа влијаат на загадувањето на амбиенталниот воздух. Според таа уредба, плаќањето на давачката се пресметуваше по скалата прикажана во табелата.

Истата уредба, подготвена од Царинската управа, во членот два, предвиде зголемување на оваа давачка во текот на две години. Односно, за 25 отсто во текот на 2021 година и уште дополнителни 25 отсто минатата, 2022 година, или вкупно 50 отсто.

Па, така, увозниците на моторни возила со кои се консултира „Блумберг Адрија“ ни објаснија дека, на пример, за „опел астра“ произведена во 2011 година давачката (во согласност со табелата погоре) за бензински мотор во 2020 изнесувала 70 денари,  а лани стигнала до 105 денари. За истата „астра“ со дизел-мотор, оваа давачка од 130 се зголеми на 195 денари.

Од Царинската управа освен што ни кажаа дека давачката ќе се пресметува на истиот начин, не ни одговорија за колку време ќе важи уредбата, дали за две години како претходната, или повеќе.

Овој одговор најверојатно е скриен во текстот на Ревидираната фискална стратегија за периодот од 2023 до 2025 година (со изгледи до 2027 година), која во декември ја помина владината процедура и на 14 декември беше доставена до Парламентот (објавена е на веб-страницата на Собранието). Во неа пишува дека овој данок ќе се пресметува во текот на четири години, што би значело дека давачката ќе се зголеми уште за 100 отсто.

„Со оданочување на моторните возила во согласност со новиот закон за данок на моторни возила, со кој, покрај основниот параметар за оданочување, е воведен и индикатор за загадување на животната средина, се придонесува за унапредување на квалитетот на животната средина, меѓу другото и преку предвиденото зголемување на данокот во просек од 25 отсто годишно во наредните четири години“, стои во стратегијата.

Во моментов нема коментари за веста. Биди прв да коментира...

Остави коментар