Македонија во рикверц во користењето енергија од обновливи извори во транспортот

Македонија се наоѓа на европското дно кога станува збор за користењето енергија од обновливи извори во транспортот. Новите податоци на „Евростат“ откриваат дека од година на година се намалува учеството на енергија од обновливи извори во транспортот во нашата земја. Ако во 2018 година учеството на енергијата од обновливи извори во транспортот изнесувало 0,118 проценти од вкупната енергија, во 2022 година тоа се намалило на 0,053 проценти. Ваквите трендови се спротивни на владините одлуки и целите поставени во националните акциски планови за зголемување на учеството на енергијата од обновливи извори во транспортот.  

Пробиени рокови

Имено, уште во февруари 2019 година Владата донесе одлука за националните задолжителни цели за учеството на енергија произведена од обновливи извори во бруто-финалната потрошувачка на енергија и за учеството на енергија произведена од обновливи извори во финалната потрошувачка на енергија во транспортот. 

„Процентуалното учество на обновливите извори на енергија во финалната потрошувачка на енергија во транспортот до 2020 година треба да изнесува 10 проценти“, пишува во владината одлука.

Во неа се додава дека таа цел треба да се постигне со имплементирање на мерките утврдени во Акцискиот план за обновливи извори на енергија. Меѓутоа, очигледно е дека мерките не биле спроведени или не биле добро осмислени кога во земјава изминативе години има континуирано намалување наместо зголемување на учеството на обновливите извори во транспортот. 

Земјите од регионот многу подобри од Македонија

Според податоците на „Евростат“, во 2022 година уделот на обновливите извори на енергија во транспортот достигна 9,6 проценти на ниво на ЕУ, што претставува зголемување од 0,5 процентни поени во споредба со 2021 година (9,1 проценти), но сепак е 0,7 п.п. под највисокото ниво досега постигнато во 2020 година (10,3 проценти).

„Ова значи дека е потребен голем притисок за да се исполни целта од 29 проценти поставена за 2030 година со директивата на ЕУ 2023/2413 за унапредување на користењето енергија од обновливи извори. Оваа директива исто така им нуди на земјите можност да постигнат различна цел: намалување на интензитетот на стакленички гасови во транспортот за најмалку 14,5 проценти до 2030 година“, велат од „Евростат“.

 

Шведска (29,2 проценти) е земја на ЕУ со најголем удел на обновливи извори во транспортот и веќе ја постигна целта за 2030 година. Финска (18,8 проценти) исто така покажува многу високо учество, иако сепак ќе треба да се зголеми за околу 10 п.п., доколку ја избере целта за 2030 година во однос на уделот на обновливите извори на енергија. По двете нордиски земји, следуваат Холандија, Малта, Белгија, Данска, Австрија, Италија, Германија и Шпанија, сите со учество од околу 10 проценти.

Од друга страна, најниски учества се забележани во Хрватска (2,4 проценти), Латвија (3,1 проценти) и Грција (4,1 проценти). Кога станува збор за преостанатите земји од регионот Адрија, во Словенија учеството на енергија од обновливи извори во транспортот е 7,2 проценти во 2022 година, во Србија е 0,602 проценти, а за БиХ сè уште нема податоци.   

„Најголемите зголемувања од 2021 до 2022 година се забележани во Германија (+1,9 п.п.), Холандија (+1,8 п.п.) и во Унгарија (+1,6 п.п.), но дури и ако се одржат до 2030 година, тие стапки се недоволни за да се постигне целта. Од друга страна, најголемо намалување е забележано во Хрватска (-4,6 п.п.), Латвија (-3,3 п.п.) и во Словенија (-2,8 п.п.)“, велат од „Евростат“.

Во моментов нема коментари за веста. Биди прв да коментира...

Остави коментар