Состојбата на средствата врз основа на портфолио-инвестиции (вложувања на македонски резиденти во странски хартии од вредност) на крајот на минатата година изнесува 917 милиони евра, од кои 760,8 милиони евра се вложувања во сопственички, додека 156,2 милиона евра во должнички хартии од вредност. Податоците на Народната банка откриваат дека има забрзан пораст на портфолио-инвестициите во странство односно зголемување за четири пати во однос на 2016 година, кога тие изнесувале околу 220 милиони евра.
Во кои земји се инвестира?
Анализирано по земји, најголеми портфолио-инвестиции има во Соединетите Американски Држави во износ од 638,2 милиона евра, во Германија во износ од 114,3 милиони евра и во Франција во износ од 36,4 милиони евра. Од аспект на оригиналната валута на вложување, најголем дел од портфолио-инвестициите се направени во американски долари и во евра (704 и 193,2 милиони евра, соодветно).
На крајот од 2023 година, анализирано од аспект на секторот на домашниот инвеститор, осигурителните друштва и пензиските фондови имаат доминантно учество, со состојба на портфолио-инвестиции во износ од 689,4 милиони евра, што претставува 75,2 проценти од вкупните портфолио-инвестиции. Според секторот на нерезидентниот издавач, доминантно учество имаат вложувањата во хартии од вредност издадени од преостанатите финансиски институции (освен осигурителни друштва и пензиски фондови и фондови на пазар на пари) во износ од 593,7 милиони евра.
ЕТФ-овите меѓу омилените инвестициски инструменти
Меѓу најголемите инвеститори резиденти во странски хартии од вредност се трите задолжителни пензиски фонда во Македонија, кои заклучно со крајот на 2023 година имаат вкупно портфолио во странство во вредност од 667 милиони евра.
Податоците на фондовите откриваат дека тие претпочитаат инвестирање во хартии од вредност и удели во ЕТФ-ови од реномирани издавачи како „Вангард груп“ (Vanguard Group), „Блекрок фанд адвајзорс“ (BlackRock Fund Advisors) и други, а кои меѓу другото се поврзани со најпознатите светски берзански индекси, како американскиот S&P и германскиот DAX, и со ЕСГ-стандардите.
Инаку, во согласност со строгата регулатива за пласман на средствата од фондовите, тие можат да инвестираат во обврзници и други хартии од вредност издадени од странски влади и централни банки на земјите членки на Европската Унија и на ОЕЦД. Потоа во должнички хартии од вредност што имаат рејтинг препорачлив за инвестирање според меѓународни кредитни рејтинг-агенции издадени од недржавни странски компании или банки од земјите членки на ЕУ и на ОЕЦД. Можат да инвестираат и во акции издадени од странски компании или банки што имаат рејтинг препорачлив за инвестирање според меѓународни кредитни рејтинг-агенции со кои се тргува на главните берзи во земјите членки на ЕУ и на ОЕЦД, како и во удели, акции и други инструменти издадени од овластени инвестициски фондови со седиште во земја членка на ЕУ или на ОЕЦД.
.webp){kind=icon}
