Поскапува пченицата на светските берзи, во Македонија е двојно поевтина од лани

Цените на житарките во мај се зголемија за 6,3 отсто споредено со април. Според податоците на Организацијата за храна и земјоделство, цените сè уште се под нивото од пред една година, но трендот на раст продолжува од месец на месец.

Според ФАО, највисок раст има кај цените на пченицата. Остриот раст во последниот месец се должи на загриженоста дека неповолните климатски услови годинава ќе ги ограничат приносите во главните производствени региони во земјите што се најголеми извозници. Приносите се намалени во делови од Европа, Северна Америка и регионот на Црно Море. Проблем е и оштетената поморска инфраструктура на Црно Море поради конфликтот во Украина.

Раст, според ФАО, има и кај цените на пченката, што е одраз на загриженоста за производството во Аргентина и Бразил поради појавата на болести и неповолните климатски услови. Во мај ФАО забележа раст и на светските цени на јачменот.

Трендот на раст според аналитичарите ќе продолжи и во наредниот период. Пченицата за испорака во септември поскапе за 3,6 отсто. Пченката за испорака во декември, пак, поевтини за 0,6 отсто.

Резервите на најниско ниво во последните девет години

Мај беше еден од најсушните месеци во регионите во Русија и Украина, од каде што доаѓа речиси третина од вкупниот извоз во светот. Ниту во другите региони вестите не се подобри, Австралија се справува со суво време, а Индија најверојатно ќе стане нето-увозник.

Во регионот на Северозападна Европа големата влажност на почвата му наштети на развојот на земјоделските култури. Во Франција уделот на пченицата и јачменот во врвни услови заостанува далеку зад минатогодишното ниво. Дождот исто така ги забави пролетните насади во Велика Британија, Германија и во Франција.

Според американското министерство за земјоделство, се очекува глобалните резерви во претстојната сезона да паднат на најниско ниво во последните девет години.

Од овие причини во анализата објавена минатиот месец аналитичкиот тим на „Блумберг Адрија“ процени дека цените на житарките ќе бидат под притисок.

„Се очекува најголемиот снабдувач на пченица, Русија, да има полоша сезона, што ќе ја затегне понудата. Од друга страна, гледаме дека американското производство обезбедува одредена рамнотежа“, се наведува во анализата.

Отворените прашања за извозот од Украина и натаму се ризик што може да ја наруши работата на пристаништата за извоз на жито.

„Тоа би можело да ја намали понудата од овој регион и да го поддржи нагорниот раст на цените“, велат нашите аналитичари.

Во Македонија пченицата од годинашната реколта е двојно поевтина од лани

Во земјава на средината на јуни се зголемија цените на лебот. Мелничарите го оправдаа поскапувањето со зголемените цени на пченицата на светските берзи, која во текот на јуни се продаваше за 27 денари за килограм.

Веднаш потоа производителите на пченица се пожалија дека годинашниот род се откупува за двојно пониска цена од лани. Во 2023 година откупната цена на пченицата изнесуваше 19 денари, а годинава цената се движи од 8 до 10 денари за килограм.

За земјоделците ова е неприфатливо и бараат откупна цена од 30 денари за килограм. Своето барање го оправдуваат со зголемените трошоци за производство.

Земјоделците очекуваат добар род годинава, но количествата како во претходните години, така и сега се намалуваат. Земјава годинава ќе произведе околу 250.000 тони од потребни 370.000 тони пченица. Недостигот ќе се дополнува од увоз.

Решение за проблемот меѓу производителите на пченица и леб нема ниту новиот министер за земјоделство. По средбите од минатата недела, тој закажа состанок и за денеска, за наоѓање прифатливо решение за двете страни.

Сепак, Министерството соопшти дека овие средби се одржуваат доцна и најавува подобра организација за следната година.

„Потребно е овие средби да се одржат многу порано, но, за жал, тие не се оствариле, затоа од следната година сите проекции и решенија ќе се дискутираат многу порано и ќе имаме јасно утврдени откупни цени пред почетокот на откупот, а не работите да се решаваат во последен момент“, пишува во соопштението од Министерството.

Во моментов нема коментари за веста. Биди прв да коментира...

Остави коментар