Кои македонски компании остваруваат најголема добивка по вработен?

Градежните компании во Македонија лани оствариле годишна нето-добивка по вработен од 500.000 денари (8.130 евра), што го става градежништвото на врвот на листата дејности рангирани по овој показател и над просекот за целокупниот корпоративен сектор, каде што лани нето-добивката по вработен изнесувала 300.000 денари (4.878 евра), покажуваат податоците на Народната банка. На второто место на оваа листа е дејноста информации и комуникации со нето-добивка по вработен во 2023 година од 400.000 денари (6.504 евра), а на третото место се трговијата, транспортот, складирањето и угостителството, каде што нето-добивката по вработен била еднаква на просекот за целиот корпоративен сектор.

Притоа, вредно е да се забележи дека во трговијата, транспортот, складирањето и угостителството лани биле евидентирани вкупно 31.037 субјекти, што ги прави убедливо најмногубројни во корпоративниот сектор.

Намалени приходи

Во последниот извештај за финансиска стабилност од Народната банка информираат дека по високиот раст во претходните две години, вкупните приходи на корпоративниот сектор во 2023 година се намалиле (за 3,6 проценти), а пад бил остварен и кај расходите (за 4,5 проценти), првенствено под влијание на намалувањето на трошоците за суровини и набавки на стоки.

„Ваквите движења во најголем дел се последица на остварувањата во дејноста индустрија и во нејзини рамки на енергетскиот сектор, чии приходи позначително се намалија по високиот раст во претходната година, кога беше под влијание на високите цени на енергентите и зголеменото домашно производство на електрична енергија во услови на енергетска криза. Кај повеќето други дејности, приходите од продажба растат и во текот на 2023 година, но забавено во споредба со претходната година“, објаснуваат од Народната банка.

Во рамките на расходите на корпоративниот сектор, наспроти намалените трошоци за суровини и набавка на стоки, и натаму растат трошоците за вработени, со забавена но двоцифрена стапка на раст во однос на  претходната година (во услови на забрзан раст на просечната бруто-плата и речиси непроменет број на вработени).

Најголем пораст на платите во градежништвото

Според НБРМ, просечната бруто-плата исплатена во корпоративниот сектор во 2023 година се зголеми за 16,4 проценти на годишна основа.

„Просечните месечни плати бележат раст во сите одделни дејности од корпоративниот сектор, при што со највисока стапка растеа во градежништвото (19,2 проценти) и во дејностите во врска со недвижен имот, стручни, научни, технички, административни и помошни услужни дејности (18,3 проценти)“, наведуваат од Народната банка.

Истовремено, бројот на вработени во корпоративниот сектор лани се зголемил само за 0,1 процент на годишна основа, по позначителното намалување од 14,3 проценти во претходната година.

„Намалувањето на вработеноста е најголемо кај дејноста земјоделство, шумарство и рибарство, додека зголемувањето произлегува од градежниот сектор“, укажуваат од Народната банка.  

Платите растат побрзо од продуктивноста

Од централната банка додаваат дека од аспект на показателите за конкурентноста, продуктивноста на корпоративниот сектор, следена преку додадената вредност по вработен, оствари солиден раст (11,2 проценти), но побавен во однос на претходната година (кога се зголеми за 15,6 проценти главно поради намалениот број на вработени).

„Од друга страна, побрзиот раст на платите (кој е повисок и од растот на продуктивноста), во услови на стагнација на бројот на вработени во секторот, придонесе за зголемување на трошоците по единица труд (за 5,3 проценти наспроти намалувањето во претходната година за 3,2 проценти). Ваквите движења укажуваат на потребата од подобрување на продуктивноста во работењето што ќе го поддржи растот на платите, без притоа да се загрози конкурентноста на секторот“, наведуваат од НБРМ.

 

Во моментов нема коментари за веста. Биди прв да коментира...

Остави коментар