Пад на прометот во индустријата од 11,1 отсто на годишно ниво

Прометот на индустријата во земјава бележи значителен пад. Државниот завод за статистика пресмета дека во периодот од јануари до октомври годинава прометот опаднал дури за 11,1 отсто споредено со истиот период лани. Притоа, намалувањето е многу поголемо на странскиот отколку на домашниот пазар. Имено, во десетте анализирани месеци во 2024 година споредено со истите тие од 2023 година прометот во индустријата на домашниот пазар е намален за 2,3 проценти, но на странските пазари бележи пад од 14,1 отсто.

 

 

Вкупниот промет во индустријата најмногу опаднал кај капиталните производи, дури за 22,8 отсто, а поголем пад има и во преработувачката индустрија, каде што индексот паднал за 11,5 отсто. Процентуално, најмногу опаднал прометот кај производството на возила (-30,5 отсто), дрвната индустрија (-27,5 отсто), кожарската индустрија (-23 проценти) и другата производствена индустрија (-41,8 проценти).

Ако анализираме подетално според сектори и одделни пазари, тогаш податоците покажуваат дека на странските пазари минусот е најдебел кај капиталните производи, каде што намалувањето изнесува 23,4 отсто,, и во преработувачката индустрија, чиј промет паднал за 14,7 проценти.

Тука раст на прометот има кај трајните производи за широка потрошувачка (седум отсто) и во секторот рударство и вадење камен (1,6 проценти).

 

 

На домашниот пазар, пак, скромен раст има единствено на прометот остварен со нетрајни производи за широка потрошувачка од два отсто, додека сите други сектори се во негатива, од кои најголем пад бележи секторот рударство и вадење камен (-11,2 отсто), прометот со трајни производи за широка потрошувачка бележи пад од 10,8 отсто, а кај интермедијарните производи намалувањето изнесува 6,9 проценти.

Освен прометот, продуктивноста е уште еден во низата проблеми на индустријата

„Блумберг Адрија“ пишувавме и за тоа дека опаѓа продуктивноста во индустријата, а минималната плата воопшто не оди во корист на продуктивноста на работниците.

 

 

Она од што најмногу стравуваат и работодавците и експертите е дека индустријата веќе не може да се справи со растот на платите, како на минималната така и на просечната, а податоците за продуктивноста ги потврдуваат тие стравови.

Според експертите, растот на платите во овие две и пол години не е резултат на подобрувањето на перформансите на компаниите, туку е резултат на барањата за зголемување на платите поради растечките трошоци за живот

„Платата во земјава се зголемува без да се гледаат резултатите, тоа е едниот проблем што влијае на намалувањето на продуктивноста. Вториот проблем е начинот на кој се исплаќа платата. Кај нас не се исплаќа работа по час, туку месечно. Тоа значи дека не се мери кој колку сработил за еден час туку сите земаат иста плата. Нема варијабилен дел, кој ќе ги стимулира работниците да испорачаат подобри резултати и да заработат повеќе“, изјави неодамна за „Блумберг Адрија“ професорот на Универзитетот на Југоисточна Европа Гадаф Реџепи.

Автомобилскиот сектор моментално е меѓу најзагрозените

Минатонеделните податоци од Државниот завод за статистика покажаа значителен пад на извозот за Германија, најголемиот трговски партнер на Македонија. Кон таа земја оди повеќе од 40 проценти од вкупниот извоз. Па, падот на годишно ниво во апсолутна бројка изнесува 351,4 милион евра, што е намалување од 13,5 проценти.

Со оглед на тоа што Германија веќе втора година по ред се бори со економски контракции, што подразбира намалено индустриско производство, пред сė во автомобилскиот и енергетскиот сектор, тоа де факто се одразува и на трговската размена со Македонија, бидејќи најголем дел од извезените производи оттука се всушност делови и компоненти што се произведуваат по нарачка од производителите на автомобили во најголемата европска економска сила.

Во моментов нема коментари за веста. Биди прв да коментира...

Остави коментар