Владата прогласи енергетска кризна состојба

Доцна вечерва Владата донесе две одлуки со кои прогласува кризна состојба во снадбувањето со топлинска енергија во Скопје и кризна состојба во снабдувањето со електрична енергија на територијата на целата држава.

“Првата одлука се донесе заради недостиг на топлинска енергија, можноста за користење на алтернативно гориво и состојбите на пазарот на топлинска енергија. Додека втората се донесе заради недостиг на електрична енергија и состојбите на пазарите на електрична енергија“, пишува во соопштението од Влада.

Постоењето на кризната состојба во снабдувањето со електрична и топлинска енергија се воведува од 1 септември и ќе трае 30 дена, односно до крајот на септември.

„Комисијата за следење на состојбите со снабдување со електрична и топлинска енергија постојано ја следи, анализира и проценува состојба на пазарите на електрична и топлинска енергија и предлага мерки согласно уредбите кои ги регулираат критериумите и условите за прогласување на кризна состојба“, пишува во владиното соопштение.

По истекот на овие 30 дена за да се продолжи важноста на кризната состојба како што е планирано до 31 март, Владата ќе треба да достави предлог до Собранието, каде пратениците ќе одлучуваат за нејзино продолжување.

Кризната состојба се прогласува за да може да се маневрира со парите во буџетот, објаснуваат за Блумберг Адриа владини извори. Односно да може со владина одлука да се врши пренамена на средства за енергетските капацитети.

Денеска во разговор за Блумберг Адриа ТВ универзитетскиот професор Димитар Димитров даде свои предлози Владата да го укине ДДВ-то за произведената електрична енергија од обновливи извори и да се олесни процедурата и да се намали бараната проектна документација за инсталирање сопствено производство на електрична енергија во домаќинствата. Според него, таквиот потег ќе ги поттикне домаќинствата да инсталираат повеќе фотоволтаици и на тој начин ќе се придонесе во еден дел за справување со енергетската криза.

Инаку, со ребалансот на буџетот обезбедени се околу 80 милиони евра за резревни мерки кои се додаваат на претходно резервираните 50 милиони евра за истата намена. Овие пари Владата ќе ги користи за ублажување на последиците од енергетската криза.

Освен овие пари, преку Европската банка за обнова и развој (ЕБОР) треба да се обезбедат уште 100 милиони евра евтини заеми,  за поддршка на ликвидноста на државното електростопанство, ЕСМ, кое во моментов произведената струја ја продава под пазарната цена за да не дојде до голем ценовен шок.

Во моментов нема коментари за веста. Биди прв да коментира...

Остави коментар