Народната банка очекува раст на цените на нафтата

Најновите проекции упатуваат на нагорна ревизија кај цените на нафтата изразени во евра при што се очекува поголем раст во 2022 година и малку помал пад во 2023 година, соопшти Народната банка во новиот извештај за макроекономските показатели. Оттаму додаваат дека оцените за јакнење на вредноста на САД-доларот во однос на еврото во поголем дел ги објаснуваат нагорните ревизии кај нафтата.

„Во однос на цените на металите, ревизиите се надолни, како резултат на загриженоста околу идната побарувачка од Кина и очекувањата за послаб глобален раст. Притоа, тековно се очекува помал раст на цените на бакарот и никелот во 2022 година во однос на проекцијата од април, како и пад, наместо минимален раст на цената, на никелот и поголем пад кај цената на бакарот во 2023 година“, информираат од Народната банка.

Оцените за растот на цените на пченката и пченицата во 2022 се ревидирани претежно во надолна насока во споредба со април.

„Така, за 2022 година се очекува помал раст кај пченицата и раст со слична големина кај пченката, при поповолни оцени за идното производство, загриженост околу идната побарувачка и подобрени изгледи во однос на снабдувањето од Украина. За 2023 година, и натаму се очекува пад, но помал кај пченицата, а поголем кај пченката во однос на априлските проекции“, велат од Народната банка.

Неизвеност кај инфлацијата

Од НБРСМ информираат дека годишната стапка на инфлација во периодот јануари – јули 2022 година изнесува 10,9 проценти и е повисока во однос на последните проекции.

Оттаму објаснуваат дека годишната динамика на инфлацијата и натаму главно е одраз на фактори на страната на понудата, односно на порастот на увозните цени на храната и енергијата, вклучително и на домашната цена на електрична енергија која е под влијание на случувањата во глобалниот пазар на енергија.

„Нивниот подолготраен и посилен раст создава пренесени ефекти и врз цените на останатите производи и услуги. Сепак, во јули годишната стапка на базичната инфлација која ги исклучува цените на храна и енергија се задржа на 6,9 проценти, односно забележа иста стапка како во претходниот месец. Во однос на очекуваните движења за цените на надворешните влезни претпоставки кај проекцијата на инфлацијата, ревизиите се во различни насоки, односно направена е нагорна ревизија на растот на странската ефективна инфлација и на цените на нафтата, додека надолна ревизија е направена кај растот на дел од цените на храната. Сепак, во услови на значителни осцилации во движењето на светските цени на примарните производи, предизвикани главно од војната во Украина и воведените санкции кон Русија, нивното движење е променливо и тешко предвидливо, со што неизвесноста во однос на идните движења на цените е исклучително нагласена“, укажуваат од Народната банка.

Ризици кај економскиот раст

Во однос на домашната економска активност, остварувањата во првиот квартал од 2022 година се малку подобри од проектираните, а расположливите високофреквентни податоци за економската активност за вториот квартал засега упатуваат на натамошен економски раст, велат од Народната банка.

„Но, надолните ревизии на странската побарувачка поради ефектите од воениот конфликт во Украина и силниот одраз врз пазарите на примарните производи и синџирите на снабдување ги нагласуваат надолните ризици за растот. Девизните резерви се одржуваат на соодветно ниво и во сигурна зона, со значително намалени притисоци од енергетската криза на девизниот пазар во вториот квартал и значителен прилив на девизи на менувачкиот пазар. Во монетарниот сектор, кредитната активност и натаму е над проекциите, додека динамиката на вкупната депозитна е послаба споредено со очекувањата“, соопшти централната банка.

Во моментов нема коментари за веста. Биди прв да коментира...

Остави коментар