ЕИБ планира нова кредитна линија за енергетски ефикасни проекти

Европската инвестициска банка (ЕИБ) планира да потпише нова кредитна линија со Развојната банка на Македонија за поддршка на декарбонизацијата на компаниите и воведувањето зелени и енергетски ефикасни технологии. Ова со Блумберг Адриа го сподели Бјорн Габриел, претставникот на ЕИБ во Македонија.

„Оваа инвестиција е дел од мерките што ги донесе владата на Северна Македонија како одговор на актуелната криза предизвикана од војната во Украина“, образложува претставникот на ЕИБ.

Бјорн Габриел, ЕИБ

Активностите на ЕИБ и финансиската поддршка за регионот се интензивираат во последниот период, а македонските компании имаат можност да дојдат до евтини кредити преку кредитните линии што ЕИБ ги пласира сега веќе и преку својата новоотворена канцеларија во Скопје, која што функционира веќе три месеци.

„Навистина, отворањето на канцеларијата на ЕИБ во Северна Македонија е дел од нашите планови за проширување на нашата финансиска и техничка поддршка за Западен Балкан во рамките на нашата нова филијала наречена ЕИБ Глобално, посветен на нашите деловни активности надвор од Европската Унија“, образложува Габриел и додава дека претставништвото во Скопје ќе биде целосно посветено на активностите во Македонија.

„Од отворањето на претставништвото на ЕИБ во Скопје, со задоволство можам да кажам дека веќе е одобрен еден проект за финансирање од ЕИБ. Тоа подразбира изградба и рехабилитација на инфраструктура за водоснабдување, собирање и третман на отпадни води, како и итни мерки за заштита од поплави за 80 општини во Северна Македонија“, вели Габриел. Според плановите на ЕИБ,  договорот за оваа инвестиција, вредна 50 милиони евра, ќе биде потпишан во наредните месеци.

Од ЕИБ сметаат дека претставништвото ќе помогне подобро да ги разберат конкретните финансиски потреби како на централната и локалната власт, така и на приватниот сектор, па ќе можат согласно потребите да ги приспособат техничката и советодавна поддршка.

„И ќе ни помогне да работиме рака под рака со тимот на Делегацијата на ЕУ за Северна Македонија за да го извлечеме максимумот од достапната поддршка на Европската унија“, вели Бјорн Габриел за Блумберг Адриа.

Во моментов, покрај таа во Скопје, ЕИБ има канцеларии и во Сараево и Тирана, како и регионално претставништво во Белград.

„Истовремено, ЕИБ го проширува својот регионален тим за Западен Балкан, којшто исто така ќе биде достапен за нашите проекти во Северна Македонија. Ова ја одразува нашата посветеност да им помогнеме на земјите од Западен Балкан да имаат корист од зголеменото финансирање и техничка помош од ЕУ за проекти во областите на дигитализација, транспорт, енергија, здравство, образование и истражување“, образложуваат од ЕИБ, додавајќи дека се работи за приоритети во рамките на најновата иницијатива на ЕУ, Глобална порта, што има за цел да се справи со најитните глобални предизвици, од борбата против климатските промени, до подобрување на здравствените системи, поврзувањето и зајакнувањето на конкурентноста и безбедноста на глобалните синџири на снабдување.

Какви проекти поддржува ЕИБ?

Претставниците од ЕИБ и нивните партнери во Македонија веќе се во комуникација за можностите за зголемување на поддршката на ЕИБ Глобално како за тековни, така и за идни проекти.

„Целта е да се зајакне капацитетот на земјата да подготвува и имплементира проекти, коишто меѓу другото треба да резултираат со зголемен пристап до фондовите достапни преку Економскиот и инвестицискиот план на ЕУ за регионот и особено за Северна Македонија“, образложуваат од ЕИБ.

Bloomberg

„Нашиот заем од 68 милиони евра е надополнет со грантови од Иницијативата за јакнење на отпорноста на економијата на ЕИБ (ERI) и Инвестициската рамка на ЕУ за Западен Балкан (WBIF). Проектот ќе поддржи јавно здравство, почисти реки и подобри услови за живот за околу 500.000 луѓе“, вели Бјорн Габриел, претставникот на ЕИБ во земјава, додавајќи дека во моментов се спроведуваат нови инвестициски проекти, како што се инвестиции во инфраструктурата за комунален водовод и отпадни води, континуирана финансиска поддршка за македонските компании и развојот на одредени делници од железничката инфраструктура на Коридорот 8.

Банката на ЕУ, исто така, работи на развој на нови инструменти за гаранција и споделување ризик за приватниот сектор во рамките на Европскиот фонд за одржлив развој плус (EFSD+), во соработка со Европската комисија. Но, покрај финансиска, нудат и техничка поддршка за проектите.

„Разговараме и ги оценуваме можностите да обезбедиме приспособена советодавна поддршка за конкретни реформски напори, инвестициски програми и проекти. Ова може да вклучува советодавна поддршка кога станува збор за позеленување на финансискиот систем во согласност со таксономијата на ЕУ за одржливи финансии, зајакнување на капацитетот на јавниот сектор за подобро спроведување приспособени инвестициски програми, како и конкретна техничка помош за проекти на железничката инфраструктура на Коридорот 8“, велат од ЕИБ.

Техничката помош за проектите е од особено значење затоа што Европската инвестициска банка обезбедува долгорочни инвестиции што бараат солидна подготовка од страна на партнерот и внимателен преглед од страна на Банката на ЕУ. Ова вклучува сеопфатни физибилити студии, еколошки, социјални и финансиски процени, како и договор за потенцијалните финансиски аранжмани. Врз основа на овој подготвителен и проценителен процес, Управниот одбор на ЕИБ, составен од земјите-членки на ЕУ и Европската комисија – ја разгледува и одобрува инвестицијата.

„Важно е да се нагласи дека ние сме финансиска институција управувана од побарувачката“, велат од ЕИБ.

Колкава е досегашната поддршка од ЕИБ за Македонија?

ЕИБ е активна во Македонија од 1991 година, обезбедувајќи финансирање од 1,1 милијарда евра за поддршка на клучните инфраструктурни проекти, локалните власти и приватниот сектор.

„Над половина од нашето вкупно финансирање беше наменето за малите и средни претпријатија во Северна Македонија, што им помогна да ги прошират бизнисите и работната сила. Со инвестирање 128 милиони евра во инфраструктура за вода и отпадни води, придонесовме за подобрен пристап до вода за пиење и санитарни услуги за луѓето низ целата земја“, велат од ЕИБ и додаваат дека ја поддржале изградбата и на новата делница од 28 километри од автопатот на Паневропскиот коридор 10, меѓу Демир Капија и Смоквица, со што се придонесува за подобрување на капацитетот, безбедноста во сообраќајот и се скратува времето на патување на оваа релација.

Од почетокот на пандемијата во 2020 година, ЕИБ обезбеди 156 милиони евра финансирање за земјата за да поддржи побрзо закрепнување, енергетска безбедност и задржување на работните места. Средствата беа обезбедени во рамките на финансискиот пакет на Тим Европа за социоекономско закрепнување на Западен Балкан од последиците на КОВИД-19.