Претседателот на Банката на федералните резерви (ФЕД) во Сент Луис, Џејмс Булард, рече дека одлуката на Организацијата на земји извознички на нафта (ОПЕК) да го намали производството е неочекувана и дека зголемувањето на цената на нафтата може да ја отежне малку работата на ФЕД во однос на намалувањеto на инфлацијата.
„Ова беше изненадување. Дали тоа ќе има трајно влијание, мислам дека е отворено прашање. Цените на нафтата флуктуираат наоколу и тешко е точно да се следат. Дел од тоа може да доведе до инфлација и да ни ја отежне работата“, рече тој денеска во интервјуто на телевизијата „Блумберг“. Булард оваа година не гласа за монетарната политика.
Фјучерсите на сурова нафта драстично напредуваа откако нафтениот картел во неделата објави намалување на производството за повеќе од еден милион барели дневно. Признавајќи ја потенцијалната важност на промената, Булард рече дека зголемувањето на цената на нафтата оваа година е во согласност со неговите економски изгледи за поголема побарувачка за енергија.
„Сепак, би очекувал нешто повисоки цени на нафтата, со тоа што Кина ќе се врати порано од очекуваното, уште во првата половина на 2023 година, поради силните податоци во САД, а и поради тоа што Европа ја заобиколува рецесијата“, рече тој.
Креаторите на политиките минатиот месец ги зголемија каматните стапки за четвртина процентен поен и тие сега се во опсег од 4,75 до 5 отсто, продолжувајќи ја со тоа својата едногодишна нагорна кампања, чија цел е да ја смират инфлацијата и покрај неодамнешните превирања во банкарскиот сектор. Тие исто така преку квартални прогнози сигнализираа дека оваа година очекуваат ново зголемување на каматите од тој размер.
Булард минатиот месец рече дека неговата лична прогноза е дека стапките ќе достигнат максимум од 5,625 отсто оваа година. Следниот состанок на официјалните лица на ФЕД е на 2 и 3 мај.
Од друга страна, инвеститорите се обложуваат дека ФЕД ќе ги намали стапките за приближно 50 базични поени до крајот на 2023 година, главно поради тоа што неодамнешниот колапс на банката „Силикон валеј“ (СВБ) ги зацврсти ставовите дека притисокот во финансискиот сектор ќе ги доведе САД во рецесија. Но шефот на ФЕД во Сент Луис рече дека Волстрит става преголем акцент на идејата дека банкарските превирања ќе се зголемат и суштински ќе ги сменат економските изгледи.
Булард рече дека гледа веројатност од 80 до 85 проценти дека финансиските стресови ќе се намалат, економијата ќе продолжи да расте со ниска стапка, а пазарот на трудот ќе остане затегнат.
„ФЕД усвои двонасочна стратегија што користи макропрудентни алатки за справување со банкарските прашања, додека продолжува да ја применува монетарната политика во обид да ја намали инфлацијата“, рече Булард.
„Можете да одите и да џвакате гума во исто време. Имате макропрудентни алатки за финансиски стрес и имате монетарна политика за борба против инфлацијата“, рече тој.
.webp){kind=icon}
