Времето немилосрдно тече, Бајден и Мекарти на нова средба за американскиот долг

Претседателот Џо Бајден и претседателот на Претставничкиот дом од редовите на републиканците Кевин Мекарти ќе се сретнат в понеделник за да разговараат за спречување на катастрофалниот исход од неисплаќањето на обврските на САД, бидејќи времето истекува, а клучните разлики остануваат.

Преговорите со денови варираат меѓу напредок и ќор-сокак, додека двете страни истовремено се борат за политичка предност и договор.

Внимателно избрани преговарачи зборуваа повеќе од два часа во неделата вечер во канцеларијата на Мекарти на Капитол, но не соопштија за статусот на тие преговори пред новинарите.

Трговците се подготвени за турбуленции на пазарите со отплатата на долгот на американскиот Трезор, кој долго време се сметаше за светски репер за финансиска сигурност, а кој може да стане проблематичен веќе од 1 јуни. Американските берзи паднаа во петокот, откако републиканците привремено ги напуштија преговорите.

Инвеститорите ја разгледуваат можната пауза во зголемувањето на каматните стапки од страна на Федералните резерви (ФЕД) во однос на ризикот од неисплаќање на обврските на САД. Договорите за индексите S&P 500 и Nasdaq 100 беа на малку пониско ниво, што придонесе за пад во петокот.

Откако разговорите заглавија викендов, Бајден телефонски разговарал со Мекарти на враќање од меѓународниот самит во Јапонија. Мекарти им соопшти на новинарите дека повикот бил продуктивен, враќајќи ја оптимистичката перспектива на дијалогот, по претходниот песимизам.

Bloomberg Mercury

Бајден се врати во Вашингтон доцна во неделата. „Сè помина добро“, рече тој за разговорот. „Ќе разговараме и утре“.

Министерката за финансии Џенет Јелен претходно во неделата изјави дека шансите САД да можат да ги платат сите свои сметки до средината на јуни се „доста мали“. Јелен ја нагласи итноста на ситуацијата, велејќи за Ен-би-си (NBC) дека тогаш се очекуваат значителни даночни плаќања.

Таа претходно рече дека САД би можеле да останат без средства за да ги реализираат сите свои исплати веќе на 1 јуни. Економистите од „Голдман Сакс“ (Goldman Sachs Group Inc.) во белешка до клиентите проценуваат дека готовинското салдо на американското министерство за финансии ќе падне под нивото потребно за исплата на долговите до 8 или 9 јуни, но се предвидува и можност за неисполнување на обврските до 1 јуни.

Економско влијание

Тековниот застој околу плафонот на долгот има потенцијал дополнително да ја оптовари американската економија, која е веќе ранлива на рецесија по серијата зголемувања на каматните стапки на ФЕД, според „Блумберг економикс“.

Кратењата на трошоците и одредени ограничувања се клучните спорни точки во преговорите. Бајден, пред да замине од Јапонија, за новинарите изјави дека предложил намалување на трошоците и дека сега е на републиканците да ги променат своите барања. Претседателот инсистираше на тоа дека нема да се согласи на договор што ги штити даночните олеснувања за богатите, индустријата за фосилни горива и фармацевтската индустрија, а истовремено го намалува финансирањето за здравството и образованието.

Bloomberg

„Сега е време другата страна да се оддалечи од своите екстремни позиции, бидејќи многу од она што тие веќе го предложија, едноставно и искрено, е неприфатливо“, рече Бајден.

Републиканците ги намалија своите барања за ограничување на трошоците од 10 на шест години, според извори запознаени со разговорите, но Белата куќа сепак сака договорот да трае две години.

Еден од упатените извори вели дека Републиканската партија сè уште бара големо покачување на трошоците за одбрана за следната година  - нешто што ќе ги продлабочи кратењата кај социјалните услуги. Демократите побараа одбраната, која сочинува околу половина од сите федерални дискрециски трошоци, да не биде изолирана од кратењата.

Во моментов нема коментари за веста. Биди прв да коментира...

Остави коментар