Странските фирми ги намалуваат инвестициите во Кина, а домашните „трчаат“ надвор

Странските компании извлекоа повеќе пари од Кина во текот на минатиот квартал, што е знак дека некои инвеститори се сè уште песимисти иако Пекинг воведува стимулативни мерки насочени кон стабилизирање на растот.

Странските директни инвестиции (СДИ) во Кина се намалија за 8,1 милијарди долари во третиот квартал, покажуваат податоците на Државната управа за девизи, објавени доцна во петокот. Од почетокот на годинава, пак, тие се намалија за речиси 13 милијарди долари.

Странските инвестиции во Кина опаднаа во изминатите три години откако го достигнаа рекордот во 2021 година и тие претставуваат жртва на геополитичките тензии, песимизмот за втората по големина економија во светот и посилната конкуренција од кинеските фирми во индустрии како што е автомобилската. Доколку падот продолжи до крајот на годината, тоа би било првиот годишен нето-одлив на СДИ барем од 1990 година, кога всушност почнуваат да се споредуваат податоците.

Меѓу компаниите кои повлекоа некои операции во Кина оваа година се производителите на автомобили „Нисан“ (Nissan Motor Co.) и „Фолксваген“ (Volkswagen AG), а тука се и други поголеми компании како „Коника минолта“ (Konica Minolta Inc.). „Нипон стил“ (Nippon Steel Corp.) во јули објави дека излегува од заедничкото вложување во Кина, додека „Интернешнел бизнис машинс“ (International Business Machines Corp.) затвора сектор за истражување на хардвер во земјата, одлука што влијае на околу 1.000 вработени.

Изгледите за проширена трговска војна и влошување на односите со Пекинг за време на вториот мандат на новоизбраниот претседател на САД, Доналд Трамп, може дополнително да влијае на инвестициите. „Геополитичката тензија е најголемата грижа за членовите на Американската стопанска комора во Шангај“, смета претседателот на комората, Алан Габор.

„Тоа го отежнува планирањето на големи инвестиции, но спротивно на тоа гледаме дека многу членови реализираат мали и средни инвестиции“, рече Габор во интервју за „Блумберг ТВ“ минатата недела.

Сепак, владините напори од крајот на септември за стимулирање на економијата веќе донесоа корист од една група странски инвеститори, при што вредноста на акциите што ги поседуваат странци скокна за повеќе од 26 отсто во однос на август, покажуваат податоците од тамошната централна банка. Кинескиот референтен берзански индекс доби речиси 21 отсто на својата вредност во септември по почетокот на координираните напори за стимулирање, иако оттогаш неколку пати забележа пад.

Спротивно на влезните, излезните инвестиции од Кина нагло се зголемуваат. Во третиот квартал кинеските фирми ги зголемија своите средства во странство за околу 34 милијарди долари, покажуваат прелиминарните податоци. Тоа го зголеми одливот досега оваа година на 143 милијарди долари.

Кинеските компании како што е БЈД (BYD Co.) забрзано го зголемуваат своите активности во странство за да обезбедат суровини и да изградат производствени капацитети на странските пазари. Тој тренд веројатно ќе продолжи и ќе се зголеми бидејќи повеќе земји поставуваат царини за некои кинески извозни производи, како што е челикот, а САД се закануваат дека ќе воведат казнени царини за сите кинески стоки.

Во моментов нема коментари за веста. Биди прв да коментира...

Остави коментар