Туризмот веројатно ќе остане единствениот сектор недопрен од царините

Цената на речиси секое добро што го консумирате може да се најде на работ на вртоглаво покачување, а глобалните пазари веќе се на раб на рецесија. Сепак, туристичката индустрија предвидува рекорден раст во следните месеци. Најоптимистичката прогноза за нејзиниот придонес во глобалната економија во 2025 година е 11,7 трилиони долари, или 10,3 отсто од светскиот бруто-домашен производ (БДП). Се предвидува дека патниците  годинава ќе потрошат повеќе од кога било на меѓународни патувања, во вкупен износ од 2,1 трилиони долари, што го надминува претходниот максимум од 1,9 трилион долари постигнат во 2019 година.

Како целина, туристичката индустрија доживеа одржлив раст откако се укинаа блокадите во периодот на пандемијата, оставајќи можност секторот да достигне 2,9 трилиони долари до 2035 година. Имајќи ги предвид индиректните придонеси на туризмот во глобалната економија, како што се купувањето резерви од страна на хотелите од нивните доставувачи и локалната моќ на трошење на персоналот во угостителството, ќе овозможи индустријата на патувања да вреди 16 трилиони долари, што би било соодветно на компанија што генерира 11,5 проценти од глобалниот БДП.

„Оксфорд економикс“ (Oxford Economics) го сподели своето истражување на секторот со „Блумберг“, но се потенцира дека беше спроведено пред објавувањето на царините од страна на администрацијата на Трамп за околу 90 земји во светот што би можеле да ги зголемат цените на стоката, да го ограничат пристапот на летовите и да ги остават американските патници - кои се познати како големи потрошувачи - со помал дискрециски приход.

Запрашана за влијанието на царините и претстојната рецесија врз наодите од извештајот, Џулија Симпсон, претседателка и главна извршна директорка на ВТТK (WTTC - World Travel & Tourism Council), во голема мера дејствува незагрижено. „Очекуваме меѓународните патувања да ги продолжат својот силен раст и трошења годинава и покрај некои краткорочни спротивставени ветрови“, изјави таа за „Блумберг“. Многу работи се сменија откако тимот го заврши своето истражување, но луѓето сè уште им даваат приоритет на нивните патувања, вели таа. „Не знаеме каде одиме со царините, но во моментот го гледаме тоа само како еден вид дамка на бројките“.
И ВТТК и „Оксфорд економикс“ ја толкуваат глобалната економска несигурност како краткорочно прашање.

Тоа делумно се должи на тоа колку однапред луѓето се обврзуваат на својот одмор, при што многу патувања се однапред платени или се направени под неповратни околности. Земете ги податоците на ВТТК за летните патувања, кои ги одразуваат постојните резервации. Тоа покажува дека Франција и Шпанија се движат кон рекордна година и дека регионите на Азија, Пацификот и Блискиот Исток доживуваат силни туристички резултати. Се очекува и туристичкиот сектор на Африка да придонесе со 225 милијарди американски долари - речиси осум отсто од БДП на континентот - што претставува зголемување од 17 проценти во однос на нивоата во 2019 година.

Според анализата на ВТТК, патувачката економија може да добие удар во САД и во Кина, што е уште една процена направена пред двете земји силно да влезат во трговска војна со царини што сега треба да надминат 100 отсто од САД и 34 отсто од Кина. Посебна прогноза фокусирана на туризмот во САД, објавена од „Оксфорд економикс“ на 3 април, предвидува пад од 9,4 проценти на влезните посети, што резултира со дефицит на потрошувачката во државата од девет милијарди долари. За тој пад се заслужни различни фактори, вклучувајќи ги и неизвесноста околу американската гранична и имиграциска политика, силниот долар, нарушената репутација и економските падови во Канада и во Мексико, два од најголемите американски пазари за посетители.

„САД и понатаму ќе бидат најголемиот пазар за патувања и туризам годинава во однос на нивниот придонес во БДП, но да, има некои спротивставени ветрови“, вели Симпсон, ветувајќи дополнителни анализи во наредните недели и месеци.

Она што е јасно, додава таа, е дека туризмот се покажа како поотпорен сектор - сектор што се враќа побрзо од повеќето други по големите војни, глобалната пандемија и другите природни катастрофи.

И покрај нејзиниот оптимистички став, Симпсон сепак има свои грижи. Како прво, „никој не знае“ како царините можат да влијаат врз сложените глобални синџири на снабдување од кои зависат патувањата. „Не би било препорачливо за мене да кажам ваква или онаква прогноза бидејќи сме точно на средината на некој процес“, вели таа. „Навистина треба само да почекаме и да видиме како ќе се одвиваат работите“, заклучува Симпсон.