За трговците со обврзници порастот на приносите на државните обврзници не беше тешко да се предвиди. Краткорочните промени се вознемирувачки. Најголемиот светски пазар на обврзници е потресен од најдолгиот период на континуирана нестабилност од почетокот на финансиската криза во 2007 година, што ја прекина стабилноста со долгиот период на историско ниски каматни стапки.
Се чини дека неизвесноста нема наскоро да престане, инфлацијата уште е највисока во последните четири децении, американските Федерални резерви (ФЕД) агресивно ги подигнуваат каматните стапки, а Вол Стрит се бори да процени колку се уште отпорната економија може да издржи.
Резултатот е дека управителите со пазарот на капитал уште не гледаат стивнување на турбуленциите.
Прочитај повеќе
Политичката нестабилност ги избрка трговците од пазарот со обврзници
Кризата во Велика Британија ја намали активноста на пазарите
20.10.2022
Како големите инвеститори се штитат од хаосот на пазарот
Миграцијата кон приватните пазари прави амортизација за многу од големите светски инвеститори од хаосот предизвикан од горливата инфлација и растечките каматни стапки.
17.10.2022
„Волатилноста на пазарот на обврзници ќе остане висока во следните 6 до 12 месеци“, рече Енвити Бахугуна, управител на портфолија и раководител за стратегија со повеќе средства во „Columbia Threadneedle“. Таа вели дека ФЕД може да паузира со зголемување на каматните стапки следната година само ако економијата биде посилна од очекуваното.
Bloomberg Mercury
Нестабилноста на пазарите турна дел од големите играчи на маргините, исцрпувајќи ја готовината од пазарот кој се бори со најголемата годишна загуба од раните 1970-ти години. Во четвртокот аналитичарите на “Bank of America Corp“ предупредија дека ликвидноста на пазарот на обврзници, или леснотијата со која што се тргува со обврзниците, се влоши и го достигна најлошото ниво од појавата на Ковид пандемијата во март 2020 година, оставајќи го пазарот кршлив и чувствителен на шокови.
По повлекувањето во периодот од јуни до почетокот од август, приносите од државните обврзници повторно пораснаа бидејќи клучната мерка за инфлација во септември скокна на највисоко ниво од 1982 година, а вработеноста остана силна. Тие бројки и коментарите од централните банкари на американските Федерални резерви (ФЕД) го наведоа пазарот да очекува дека ФЕД ќе ја избутка каматната стапка до ниво од близу 5 проценти на почетокот од следната година, во однос на сегашното ниво меѓу 3 и 3,25 отсто.
Не се очекува дека значајната и очекувана објава на податоци следната недела ќе ја промени таа перспектива. Се очекува дека Министерството за трговија ќе извести дека мерачот на инфлацијата, индексот на податоците за лична потрошувачка, се забрзал на годишно темпо од 6,3 проценти во септември, додека економијата пораснала за 2,1 отсто во текот на третиот квартал годинава, заздравувајќи од падот во претходното тримесечје.
Во меѓувреме, надлежните од централните банки ќе бидат во мирен период кој самите го наметнаа во пресрет на состанокот во ноември. Широко е распространето очекувањето дека ФЕД ќе ја донесе својата четврта по ред одлука за зголемување на каматната стапка од 0,75 проценти на состанокот на 2 ноември, па логично се поставува и прашањето до каде ќе оди ФЕД со зголемувањето на каматната стапка и дали ќе ја одведе економијата во рецесија, посебно со оглед на растечките ризици за глобално забавување додека централните банки ширум светот заеднички ги заоструваат мерките.
Неизвесноста беше нагласена во петокот, кога приносите од државните обврзници пораснаа, за потоа да паднат дури за 16 базични бодови откако „Wall Street Journal“ извести дека ФЕД веројатно ќе разговара за плановите за потенцијално забавување на темпото на зголемување на каматите и тоа веќе од следниот месец.
„Ако застанат кога инфлацијата ќе почне да паѓа и економијата да забавува, тогаш неизвесноста на пазарот ќе се намали“, рече Стив Бартолини, управител со портфолија со фиксни приходи во „T. Rowe Priceu“. „Тој ден кога ФЕД ќе паузира несигурноста би требало да се намали, но малку е веројатно дека ќе се вратиме на ниската волатилност од 2010-те години“, додава Бартолини.
Инвеститорите имаат на ум дека рецесијата и финансиската криза која следува по претераното монетарно затегнување во минатото биле поврзани со значајни скокови на несигурноста.
Тоа потенцијално претставува уште поголема болка за финансиските инвеститори, смета Боб Милер од „BlackRock Inc“, раководител на американскиот оддел со базични фиксни приходи. Но, според други инвеститори, ќе има можност да се искористи дислокацијата на пазарите и да се изградат портфолија со фиксни приходи со атрактивни приноси од над 5 проценти. Сепак, се очекува дека пазарот и натаму ќе биде погоден од промените на цените.
„Предизвиканата несигурност очигледно е најголема од 1987 година, дури и поголема од светската финансиска криза“, рече Милер, додавајќи дека во скоро време нема да се вратиме на искуствата од претходната деценија.
.webp){kind=icon}
