Време кога акционерите тријат раце: Чија дивиденда е најслатка?

Граѓаните и правните субјекти што инвестирале во акции на компании што го сочинуваат МБИ10 можат да бидат задоволни со оглед на тоа што кај сите пет акционерски друштва што досега ги објавија износите на дивидендите има зголемување во однос на претходната година. Од друга страна, кај некои од нив може да се забележи дека има намалување на дивидендниот принос, што е секако показател што треба да се земе предвид кога се оценува дивидендната политика на компаниите и кога се одлучува во кои акции да се инвестира.

„Комерцијална банка“ со речиси удвоена дивиденда

Најизразено зголемување на дивидендата од 500 на 910 денари по акција има „Комерцијална банка“. Кај банката, која лани имаше рекордна заработка, има и зголемување на дивидендниот принос од 4,28 проценти во 2022 година на 6,40 проценти во 2023 година. Една од најголемите фармацевтски компании во Македонија, „Алкалоид“, исто така ја зголеми дивидендата од 490 денари во 2022 година на 540 денари за минатата година. Кај компанијата се забележува раст на дивидендниот принос од 2,86 проценти во 2022 година на 2,97 проценти за 2023 година.

„УНИ банка“ ја зголеми дивидендата од 282 денара по акција, колку што исплати преклани, на 368 денари за минатата година. Иако кај „УНИ банка“ во овој период се забележува намалување на дивидендниот принос од 7,06 проценти на 6,86 проценти, тој е сепак меѓу најголемите меѓу компаниите што се предмет на споредба.

„ТТК банка“ засега со највисок дивиденден принос

„ТТК банка“ ја зголеми дивидендата за 2023 година на 108 денари од исплатените 67 денари по акција во 2022 година. Оваа банка се истакнува по значителното зголемување на дивидендниот принос од 4,94 проценти во 2022 на 7,45 проценти во 2023 година и засега има највисок дивиденден принос во споредба со другите компании од МБИ10. Раст на износот на дивидендата има и кај „Македонијатурист“, и тоа од 129 денари во 2022 година на 200 денари во минатата година, а може да се забележи и зголемување на дивидендниот принос од 2,95 на 4,21 проценти.

 

Од преостанатите компании што котираат на берзата, но не се дел од МБИ10, вреди да се истакне „Реплек“, каде што има зголемување на дивидендата по акција од 2.000 денари во 2022 година на 3.000 денари во 2023, а истовремено дивидендниот принос се зголеми од 2,28 проценти на 3,22 проценти. Од друга страна, „Тетекс“ се издвојува по тоа што е една од ретките компании што за 2023 година ќе исплатат дивиденда од 110 денари, што е износ еднаков на исплатената дивиденда за 2022 година. Кај оваа компанија има намалување на приносот од 4,40 проценти на 3,68 проценти.      

Што може да се очекува од преостанатите компании од МБИ10?

Ако се земат предвид остварените финансиски резултати во текот на 2023 година, веројатно е дека и акционерите во преостанатите компании што се дел од МБИ10 ќе имаат причина да бидат задоволни, што сепак на крајот ќе зависи од одлуката за распределба на профитот. Имено, „Блумберг Адрија“ веќе пишуваше дека „НЛБ банка“ лани оствари рекордна нето-добивката од 3,2 милијарди денари (52,3 милиони евра), а раководството на словенечката групација веќе најави зголемување на дивидендата.

Зголемување на добивката во 2023 година забележаа и „Гранит“, „Македонски телеком“ и „Стопанска банка“ АД Скопје. „Макпетрол“ лани прикажа помала добивка во однос на претходната година, но сепак тоа не мора да биде пресудно за износот на дивидендата што ја предлагаат менаџерите, а за која последниот збор го имаат акционерите.