Преглед на берзите: „Фолксваген“ падна, „Интел“ ги надмина очекувањата

Во фокусот на учесниците на пазарот на капитал минатата недела во Европа беше „Фолксваген“, кој објави дека затвора дури три фабрики во Германија и заврши на последното место на листата на најпознати германски автомобилски компании по стапка на раст.

Истовремено, Европската унија одобри дополнителни царини од дури 35,3 отсто за електричните автомобили од Кина, покрај постојните царини од 10 отсто. Ова дополнително ги зголеми трговските тензии меѓу водечките светски извозни сили, но според „Блумберг“, ЕУ одлучила да испрати официјални претставници во Пекинг на дополнителни разговори.

Исто така, инвеститорите се подготвуваат за едни од најважните избори во светот оваа година – претседателските избори во САД, откако повеќето анкети покажаа дека поранешниот претседател Доналд Трамп е во тесна трка со Камала Харис, актуелната потпретседателка.

Исходот од изборите во САД сигурно донекаде ќе ги разниша финансиските пазари, а кои се најважните разлики меѓу Трамп и Харис во однос на пазарите на акции и обврзници и што би можело да се промени за европските и регионалните компании кои извезуваат во САД, за „Блумберг Адрија“ објаснуваше Иван Дражетиќ, партнер и шеф на бизнисот со обврзници во „Интеркапитал“.

И Рохит Сипахималани од „Темасек“, зборуваше за „Блумберг“ за ефектите од изборниот исход.

Суровини: По падот, нафтата зајакнува, златото на рекордно ниво

Нафта

Цените на нафтата паднаа на почетокот на неделата, по нападот на Израел врз Иран и повторното обновување на напорите за прекин на конфликтот со Хезболах. Брент се тргуваше за 72 долари за барел, со ВТИ блиску до 68 долари. Сепак, во остатокот од неделата цените пораснаа, во четвртокот Брент чинеше близу 73 долари за барел, откако поскапе за два отсто во средата, додека ВТИ надмина 69 долари.

По извештаите дека Иран би можел да подготви напад врз Израел од ирачка територија во наредните денови, нафтата од типот Брент поскапе за два отсто во петокот, надминувајќи го нивото од 74 долари, додека американската сурова нафта ВТИ зајакна на 71 долар.

Bloomberg Adria Markets overview 31.10.2024.

Злато

Златото веќе во вторникот напредуваше до рекордно високо ниво за да се стабилизира во текот на неделата, откако инвеститорите забележаа профит. Во четвртокот вредеше 2.744 долари за унца, што е раст од 0,3 отсто на неделно ниво. Инвеститорите лојални на овој благороден метал имаат причина за славење, бидејќи цената на златото од почетокот на годината порасна за над 33 отсто.

Биткоин

Обидот на биткоинпт да достигне рекордно високо ниво дополнително падна во петокот, бидејќи шансите за победа на републиканскиот кандидат Доналд Трамп, пријателски настроен кон крипто, се намалија на пазарите за обложување.

Најголемата дигитална валута се тргуваше за околу 70.000 долари, откако претходниот ден падна за четири отсто, што е најголем пад за еден месец.

Трамп претходно минатата недела имаше поголемо водство на пазарите за предвидување и тогаш биткоинот се доближи на само 234 долари до својот максимум од март кога достигна 73.798 долари.

 

Растот на економијата на еврозоната не помогна берзите да станат зелени

На почетокот на минатата недела фјучерсите на европските акции се тргуваа главно во зелено, за во остатокот од неделата тргувањето да биде во минус, во пресрет на објавувањето на податоците за довербата на потрошувачите, како и за невработеноста и инфлацијата во еврозоната.

Европските пазари во понеделникот затворија со добивка, а францускиот CAC и шпанскиот индекс IBEX 35 беа најголеми добитници на регионалните берзи. Тргувањето во вторникот заврши со загуби, по разочарувачките резултати на „Бритиш Петролеум“ и „Новартис“. Ниту растот на економијата на еврозоната, кој во третиот квартал забрза до 0,4 отсто, не помогна на берзите да позеленат, а четвртокот заврши со загуби.

Прелиминарните податоци објавени во четвртокот покажаа дека инфлацијата во еврозоната пораснала на 2,0 отсто во октомври, што е над проекцијата од 1,9 отсто на економистите на „Блумберг“, но и во споредба со 1,7 отсто во септември.

Bloomberg Adria Markets overview 31.10.2024.

Истовремено, мешано се тргуваше со фјучерси на американските индекси на почетокот на неделата, во пресрет на објавувањето на новиот извештај за пазарот на трудот, како и деловните резултати на водечките компании од групацијата на седумте величевствени. Во вторникот, индексите на Волстрит забележаа добивки, на крилата на скокот на технолошките акции, при што Nasdaq го заврши тргувањето на рекордно високо ниво.

Сепак, во средината на неделата, американските индексни фјучерси се тргуваа со загуби, пред објавувањето на податоците за БДП за третиот квартал, како и деловните резултати на „Мета“ и „Мајкрософт“. Загубите продолжија дури и откако силните економски податоци ги намалија надежите за намалување на стапката од страна на Федералните резерви. Имено, американската економија во третиот квартал порасна со стапка од 2,8 отсто, по скок од три отсто во однос на претходниот квартал.

Во четвртокот индексот S&P 500 загуби 1,9 отсто, а Nasdaq 2,4 отсто од вредноста, што беше најлошиот трговски ден за овие два индекса од почетокот на септември. Бројот на неделни барања за бенефиции по основ на невработеност во САД падна повеќе од очекуваното, според податоците од четвртокот. Ова сепак укажува на силен пазар на труд и ги намалува шансите за намалување на стапката на Фед.

Регионални берзи: Индексот SASE10 забележа најголема добивка

Индексите на берзите во регионот Адрија во најголем дел забележаа добивки на неделно ниво, а најголем раст (+1,3 отсто) имаше SASE10, во кој влегуваат издавачите од Сараевската берза и CRO10 на Загрепската берза, со неделен раст од 0,9 отсто.

Индексот на Белградската берза (BELEX15) благо напредуваше (+0,4 отсто), додека индексите на Бања Лука и Македонската берза забележаа пад.

Bloomberg Adria Markets overview 31.10.2024.

Резултати од компаниите и влијание врз вредноста на акциите

Акциите на „Фолксваген“ паднаа за повеќе од еден процент на почетокот на неделата, по најавата за затворање на погоните. Новинарот на „Блумберг“ Оливер Крук зборуваше за деталите.

На крајот на неделата, акциите на „Фолксваген“ паднаа за дури 1,2 отсто веднаш по отворањето на редовното тргување во Франкфурт во петокот. Акциите изгубија 20 отсто од својата вредност оваа година, што ги прави најлоши во рамките на германскиот индекс DAX.

Американската авиокомпанија „Боинг“ во понеделникот соопшти дека ќе продаде 90 милиони обични акции за 14 милијарди долари, како и 5 милијарди долари депозитни акции, во обид да ги зајакне своите финансии во екот на долготрајниот штрајк на работниците што предизвикува значителна финансиска штета.

Водечките американски технолошки компании продолжија да објавуваат деловни резултати

Откако „Епл“ го најави новиот Ајмек во понеделникот, акцијата забележа пораст на вредноста. Сепак, во останатиот дел од неделата оваа компанија ги разочара инвеститорите со слабите прогнози и пад на продажбата во Кина, а во петокот во електронското тргување е забележан пад на акциите од два отсто.

По објавата на квартален извештај за заработката, „Епл“ соопшти дека вкупната продажба во кварталот што завршува во декември ќе порасне во ниско до средно едноцифрен опсег, додека аналитичарите очекуваа зголемување од седум проценти. Компанијата исто така објави пад на приходите во Кина минатиот квартал, што исто така беше под процените на аналитичарите. Од друга страна, вкупните приходи на „Епл“ се зголемија за 6,1 отсто на 94,9 милијарди долари, во споредба со просечната процена од 94,4 милијарди долари. Заработката изнесуваше 97 центи по акција.

Почетокот на неделата донесе раст од повеќе од пет отсто на акциите на „Алфабет“, по најавата дека се остварени подобри деловни резултати од очекувањата. Така, компанијата-мајка на „Гугл“ докажа дека скапите инвестиции во вештачката интелигенција почнуваат да даваат резултати, особено во секторот „клауд компјутинг“ и клучниот пребарувач на „Гугл“. Имено, приходите на компанијата во третиот квартал пораснале на 74,6 милијарди долари, што е за околу 16 отсто повеќе во споредба со истиот квартал лани и над очекувањата на аналитичарите.

Следеа и резултатите на „Мета“, а откако компанијата најави силно зголемување на капиталните расходи во наредната година, акциите паднаа за речиси три отсто.

И „Мета“ и „Мајкрософт“ објавија приходи повисоки од очекуваните, но и покрај ова, нивните акции паднаа поради пониските проекции за идните профити.

„Интел“ успеа да ги надмине очекувањата на аналитичарите – што е вест на која инвеститорите секогаш се радуваат. Во петокот, акциите на „Интел“ пораснаа за 9,2 отсто до 23,51 долари во електронското тргување, бидејќи повисоките проекции за приходите за четвртиот квартал ги развеселија инвеститорите. Така, најавено е дека приходот во четвртиот квартал ќе изнесува од 13,3 до 14,3 милијарди долари, наспроти просечната процена на аналитичарите од 13,6 милијарди долари. Компанијата предвидува добивка од 12 центи по акција, во споредба со шесте центи проектирани од Волстрит.

Американската компанија за е-трговија, која со текот на времето го прошири своето работење во различни сегменти, успеа и пријатно да ги изненади инвеститорите со своите оптимистички проекции. Акциите на „Амазон“ пораснаа за околу 5 отсто во електронското тргување пред да се отвори пазарот во петокот, откако објави силни деловни резултати.

Корпоративната заработка беше во фокусот на инвеститорите и во азискиот регион. Така, акциите на кинескиот производител на автомобили БЈД забележаа пад, иако кварталните приходи за првпат ги надминаа оние на американската компанија „Тесла“.

Што не очекува оваа недела:

4 ноември – објавување на заработката на „Беркшир Хатавеј“

5 ноември – Претседателски избори во Соединетите Американски Држави (САД)

7 ноември – Одлука на Федералните резерви за каматните стапки

7 ноември – Одлука за каматна стапка на Банката на Анлија и извештај за монетарната политика

7 ноември – Објава за заработката на „Комерцбанк“ и „Уникредит“

4-8 ноември – Состанок на Постојаниот комитет на Кинескиот народен конгрес

5-10 ноември – Кинеска меѓународна изложба на увозни производи