Колановиќ: Трамп ќе го запре „кловновското шоу“ за да ги спаси акциите

Претседателот Доналд Трамп инсистира дека никогаш нема да ги промени трговските политики што ги доведоа глобалните пазари во турбуленција. За Марко Колановиќ, изгледа дека претседателот е блиску до попуштање под тој притисок.

Поранешниот стратег на „ЏП Морган“ (JPMorgan Chase & Co.), познат по своите силни песимистички ставови во последните неколку години, рече дека т.н. „Трамп пут“ (Trump put) е некаде околу 4.800 на индексот S&P 500 — околу 300 поени пониско од каде што моментално се тргува. Индексот се приближи до тоа ниво претходно во сесијата пред да се врати нагоре по шпекулациите дека американскиот претседател може да ги намали своите планови за царините.

„Тој почнува да гледа дека во основа го губи ова“, рече Колановиќ во интервју. „Само гледајќи го неговиот говор на телото и објективно - тоа што се случува околу него, ние сме блиску до тој ’Трамп пут’“.

Индексот S&P 500 осцилираше над осум процентни поени во текот на понеделникот, најголемата осцилација од мечкиниот пазар за време на пандемијата во 2020 година, додека волатилноста ги опфати глобалните акции по објавата на Трамп за царините во средата. Американскиот берзански репер на крајот затвори со пад од 0,2 отсто откако загубите надминаа 5 трилиони долари во претходните две сесии.

„Тоа е, како што велат луѓето, шоу на кловнови и навистина треба да се заврши наскоро“, вели Колановиќ. „Бидејќи не е лошо само за пазарите и економијата туку всушност е лошо и за Трамп“.

Говорејќи пред новинарите во својот претседателски авион во неделата, Трамп рече дека не знае што ќе се случи со пазарот и инсистираше дека целта на царините е целосно елиминирање на билатералните трговски дефицити. Во понеделникот Трамп се закани дека ќе воведе дополнителни 50 отсто даноци на увозот од Кина, додека се подготвува за преговори со Јапонија и со Израел.

Логиката зад „Трамп пут“ е дека наклонетоста на американскиот претседател да ги користи берзанскиот пазар и економијата како извештај значи дека ќе го промени правецот ако болката стане премногу екстремна. Пут е нивото на индексот каде што се предвидува дека ќе се вмеша, во однос на опцијата пут.

„Трамп може да вели дека не му е грижа за пазарите“, рече Колановиќ. „Но пазарите ја водат економијата“.

Стратегот привлече внимание низ Волстрит минатото лето, по неговото ненадејно заминување од „ЏП Морган“ откако предвиде пад на берзата среде бумот на вештачката интелигенција во последните две години. Сега, неговиот повик, иако рано, го прави да изгледа оправдан. Иако не ги објавил плановите за неговиот следен потфат, тој не се воздржува во своите коментари за пазарот до неговата растечка публика на социјалните мрежи, вклучувајќи ја и платформата на Илон Маск, X.

 

 

Колановиќ предвидува дека пазарите се приближуваат до крајот на „фаза еден“ од распродажбата - брзото намалување на замавот предизвикано од првичните наслови за царините и стравовите од раст. Втората фаза може да се случи ако се појават видливи знаци на рецесија во економските податоци и корпоративните заработки.

Тој рече дека разликата помеѓу претходните пазарни падови што ги преживеал во текот на својата кариера на Волстрит - како падот за време на пандемијата и глобалната финансиска криза во 2008 година - е дека овој беше предизвикан, а и може да се реши, од еден поединец: Трамп.

„Овој пад е проблем создаден од еден човек“, рече Колановиќ.

Во моментов нема коментари за веста. Биди прв да коментира...

Остави коментар