Акцијата на „ЕТоро“ скокна за 29 отсто откако е-платформата за тргување направи ИПО

Акциите на „ЕТоро“ (EToro Group Ltd.) пораснаа за 29 отсто во нивната прва сесија како берзански котирана компанија, откако платформата за тргување и инвестирање и некои од нејзините инвеститори собраа речиси 620 милиони долари преку зголемена иницијална јавна понуда (ИПО).

Акциите на компанијата со седиште во Израел во средата затворија на цена од 67 долари, што е значително над цената на иницијалната понуда од 52 долара по акција. Врз основа на бројот на издадени акции, компанијата сега има пазарна вредност од над 5,5 милијарди долари.

Ова котирање само го потврдува трендот на  повторно заживување на процеси на ИПО во САД, откако повеќе компании што ги замрзнаа плановите поради берзанска нестабилност предизвикана од царините на претседателот Доналд Трамп (објавени на 2 април), сега продолжуваат со подготовките за иницијални јавни понуди.

„Добивавме добри повратни информации од инвеститорите, особено бидејќи царините реално не влијаат премногу врз нашето работење“, истакна коосновачот и извршен директор на „ЕТоро“, Јони Асија, во интервју. „Ако погледнете што правеа нашите клиенти, односно малите инвеститори во првата недела од април - тие всушност купуваа акции“.

Компанијата и група инвеститори во вторникот продадоа 11,92 милиони акции, откако понудата беше зголемена од првичните 10 милиони, а акциите беа продадени по цена над маркетинг-опсегот од 46 до 50 долари. Зголемената понуда привлече интерес за над 20 пати повеќе акции над бројот на расположливи акции, јави „Блумберг њуз“.

Фондови  управувани од „Блекрок“ (BlackRock Inc.) изразиле интерес да купат акции во вредност до 100 милиони долари по цената од ИПО, според податоците во пријавата.

Акции и криптовалути

Основана во 2007 година, „ЕТоро“ нуди платформа каде што корисниците можат да тргуваат и да следат врвни инвеститори во класи на средства како акции и криптовалути. Компанијата претходно се обиде да излезе на берза преку спојување со т.н. „бленк чек“ компанија или СПАК (SPAC), со проценета вредност од 10,4 милијарди долари.

„Мислам дека направивме правилна одлука во 2022 година да го прекинеме процесот на СПАК и да останеме некотирана компанија, фокусирајќи се од ‘раст по секоја цена’ кон профитабилен раст“, изјави Асија. „Сега излегуваме на пазарот како многу позрела компанија“.

Во рамките на ИПО, „ЕТоро“ понуди 5,96 милиони свои акции. Партнери од „Спарк капитал“ (Spark Capital), „БРМ груп“ (BRM Group Ltd.), „Андалузијан прајват капитал“ (Andalusian Private Capital) и „ЦМ Еквитис СП“ (CM Equities SP), заедно со директори на компанија, вклучувајќи ги и Јони Асија и неговиот брат Ронен Асија, понудија уште 5,96 милиони акции.

Компанијата во 2024 година пријавила нето-придонес од 787 милиони долари и нето-добивка од 192 милиони долари, покажуваат документите. Тоа е значително подобрување во однос на претходната година, кога имала 557 милиони долари нето-придонес и само 15,3 милиони долари добивка.

„ЕТоро“ во 2023 година заврши рунда на финансирање со вреднување од 3,5 милијарди долари, во која учествуваа „ИОН груп“ (ION Group) и  „Софтбанк вижн“ (SoftBank Vision Fund 2).

Според податоците во поднесените документи, санкции моментално спречуваат некои акции да бидат распределени на „СБТ Венчр фонд“ (SBT Venture Fund I), поврзан со руската „Сбербанк“ (Sberbank PJSC). Фондот, кој поседува над 6 отсто од акциите од класата А, е ограничен во правото на гласање, трансфер или добивање нови акции.

ИПО-то го водеа „Голдман Сакс“ (Goldman Sachs Group Inc.), „Џеферис фајненшл груп“ (Jefferies Financial Group Inc.),  УБС (UBS Group AG) и „Ситигруп“ (Citigroup Inc.). Акциите на „ЕТоро“ се тргуваат на Nasdaq Global Select Market под симболот ETOR.

 

Во моментов нема коментари за веста. Биди прв да коментира...

Остави коментар