Инвеститорите полагаат надеж во биткоинот по банкарската бура

Биткоинот е на пат кон една од своите најголеми неделни добивки во изминатите години, поттикнат од облозите за евентуално намалување на каматните стапки додека траат тензиите во банкарскиот сектор.

Највредниот дигитален токен порасна за 21 отсто од понеделникот. Имаше најмалку толкав неделен скок само 10 пати во последните пет години, покажуваат податоците собрани од „Блумберг“. Помалите токени, како етер и доџкоин, исто така зајакнаа.

Колапсот на три регионални американски заемодавци и немирите во „Кредит Суис“ (Credit Suisse Group AG) ги зајакнуваат очекувањата за крај на монетарното затегнување што ги погоди криптовалутите во 2022 година. Бранувањата исто така ги оживуваат тврдењата на најжестоките поддржувачи на биткоинот дека токенот е алтернатива на валутите фиат.

Биткоинот се стреми кон својот најдобар неделен резултат во последните години Bloomberg

„Тековните турбуленции во банкарскиот сектор во САД, кои потенцијално водат до порелаксиран став на Федералните резерви (ФЕД), ја зајакнуваат двојната улога на биткоинот како заштита од традиционалните финансии и кредибилно ризично средство“, рече Кунал Гоел, истражувачки аналитичар во „Месари“ (Messari).

Биткоинот порасна дури за 6,1 отсто во петокот и се тргуваше околу 26.150 долари до 8 часот наутро во Лондон. Второрангираниот етер зајакна за приближно четири проценти. Акциите исто така напредуваа, бидејќи напорите да се запре хаосот во банкарскиот сектор донекаде ги смирија инвеститорите.

Финансиските пазари очекуваат зголемувањето на каматните стапки на ФЕД - за борба против зголемената инфлација - да достигне врв во мај, проследено со намалување од околу 70 базични поени оваа година за поддршка на економскиот раст.

Пробив на биткоинот Bloomberg

„Секој знак за намалување на каматните стапки треба да ги турка фондовите кон поризични средства, што веројатно ќе биде доволно за да се донесат повеќе институционални средства на криптопазарот, без разлика дали макротрговците ја разбираат или веруваат во тезата за долгорочно инвестирање во биткоин“, рече Ноел Ачесон, авторка на билтенот „Крипто е сега макро“ (Crypto Is Macro Now).

Секторот за дигитални средства исто така се бори со острата регулаторна акција во САД по колапсот на криптоберзата FTX. Последиците од привременото нарушување на паритетот на УСД коинот (USDC) со доларот во текот на викендот исто така се филтрираат низ криптопазарите. USDC е вториот по големина стејблкоин, тип на токен што треба да држи константна вредност од еден долар.

Американската Комисија за хартии од вредност сè повеќе инсистира дека повеќето дигитални средства се токму хартии од вредност, што со себе им носи поголема заштита на инвеститорите, но и потенцијално ја отежнува трговијата со токени. Меѓутоа, американските регулатори генерално се согласни дека биткоинот не е хартија од вредност.

Доминација на биткоинот 

Ваквата регулаторна дихотомија му помага на биткоинот, додека нервозата околу стабилните коини поттикна некои инвеститори да се префрлат на највредниот токен, според Маркус Тилен, раководител на истражување во „Матрикспорт“ (Matrixport).

Биткоинот сега учествува со 43 отсто од вкупната пазарна вредност на криптосекторот, што е најголем удел од јуни 2022 година, според податоците од платформата „Коин геко“ (CoinGecko).

Токенот годинава порасна за околу 57 отсто и е на највисоко ниво од јуни 2022 година. Но, сепак, останува далеку од највисокото ниво од речиси 69.000 долари во ноември 2021 година.