.webp){kind=icon}
Неколку компании за копање биткоини се сретнаа со поранешниот американски претседател Доналд Трамп во одморалиштето Мар-а-Лаго во вторникот вечер, изјави Метју Шулц, извршен претседател на фирмата за ископување криптовалути „Клин спарк“ (CleanSpark Inc).
Трамп им кажал на присутните дека ги сака и ги разбира криптовалутите, додавајќи дека рударите на биткоин помагаат да се стабилизира снабдувањето со енергија од мрежата, посочи Шулц. Трамп рекол и дека ќе биде застапник на рударите во Белата куќа, додаде Шулц.
Тимот на Трамп не одговори веднаш на барањето за коментар. Во објава на неговиот профил на Трут (Truth Social), Трамп рече дека копањето биткоини може да биде „нашата последна линија на одбрана против CBDCs“, мислејќи на дигиталните валути на централните банки, додавајќи дека сака сите преостанати биткоини да бидат „направени во САД“.
Поранешниот претседател сè повеќе ги истакнува биткоинот и другите дигитални средства во кампањата во последните недели како начин да допре до нови гласачи. Тој доби совет на оваа тема од Илон Маск и на неодамнешна конвенција вети дека ќе ја ублажи казната на Рос Улбрихт, осудениот основач на онлајн пазарот „Силк роуд“ (Silk Road). Тој исто така сега прифаќа криптодонации за неговата кампања.
Џејсон Лес, извршен директор на „Рајот“ (Riot Platforms Inc.), исто така се состанал со Трамп во Мар-а-Лаго, според објава на X.
Влијание врз климата и електричната мрежа
Состанокот се случи во ситуација кога крипторударите закрепнуваат од реакции поради низа прашања, вклучувајќи ги и климатските промени и нивното влијание врз локалните електроенергетски мрежи. Демократите ги водеа напорите за заострување на контролата за употребата на енергија и емисиите на јаглерод од рударите на биткоин, додека сенаторот од Тексас, Тед Круз, беше истакнат поддржувач на индустријата.
Во меѓувреме криптосекторот дава поддршка за кандидати што се сметаат за погодни за индустријата за дигитални средства, вклучувајќи и со зголемување на донациите за политичката организација „Фершејк“ (Fairshake).
Соединетите Американски Држави ја заменија Кина како епицентар на ископувањето биткоин од 2021 година, кога Пекинг воведе забрани за овој сектор. Енергетски интензивниот процес вклучува користење енергетски интензивни компјутери за потврдување шифрирани трансакции на блокчејнот на биткоин, со награди исплатени во криптомонети.
