Пет клучни причини за моменталниот пад на цените на криптопазарот

Криптопазарот доживува сериозна надолна ценовна корекција. Во моментот на пишување биткоинот падна под 100.000 долари, запишувајќи корекција од речиси пет проценти во период од 24 часа. Уште подраматични се падовите на пазарот на алтернативни монети, на пример етериум и солана, кои паднаа за околу осум проценти за 24 часа, додека XRP падна за три проценти. Проверивме што го тресе криптопазарот?

1. Одлуката на Федералните резерви на САД

Исто како што инвеститорите реагираа бурно на реториката на првиот човек на Федералните резерви на САД (Фед), Џером Пауел, и плановите на Фед да го намали бројот на кратења на каматните стапки во 2025 година, слично реагираше и криптопазарот. Цената на биткоинот падна под 100.000 долари по одлуката на Фед, но потоа закрепна следниот ден. Утрово котира околу нивото од 97.000 долари.

Промените на криптопазарот се брзи и драматични, така што и денес треба да се очекува многу голема нестабилност.

 

2. Повлекување на добивките

Традиционално, инвеститорите ја користат можноста да ги оптимизираат своите портфолија на крајот на годината. Денешните падови на криптопазарот, според многумина упатени, се резултат на заработката на профитот по доста големиот раст по изборот на Доналд Трамп за претседател на САД. Во меѓувреме, биткоинот доби дури 40 отсто од својата вредност. Годинава, пак, забележа раст од над 110 проценти.

„Изгледа дека станува збор за повлекување на профитот на крајот на годината. Ништо фундаментално не ја поттикна оваа последна распродажба“, потврди за „Блумберг“ Едвард Чин од „Паратаксис“ (Parataxis).

3. Се очекуваат корекции во биковски тренд

„Корекциите не се невообичаени во биковски тренд“, изјави за „Блумберг“ Страхиња Савиќ, раководител за аналитика во „ФРНТ фајненшл“ (FRNT Financial).

Корекциите се сосема природен дел од функционирањето на финансиските пазари. На берзите обично гледаме од две до три големи корекции годишно, кога стапките паѓаат за околу пет до десет проценти, но на криптопазарот тие падови имаат тенденција да бидат поголеми, дури и над 10 отсто, особено на алтернативниот пазар на дигитални монети.

Корекциите во принцип се можност за нови набавки по подобри цени. Меѓутоа, проклетството на корекциите е што не знаеме кога ќе завршат. Прашањето е дали денешните корекции можат да го сменат трендот и дали ќе видиме подолготрајни корекции? Аналитичарите не очекуваат вакво сценарио на берзите, но бидејќи криптопазарите сè повеќе се во корелација со берзите, очекувањата се доста слични.

„Има уште доволно ликвидност и пазарите засега сè уште се силни“, кратко одговори аналитичарот Тилен Шарлах. Економските податоци се охрабрувачки, пазарот на трудот е робустен, инфлацијата останува стабилна и всушност порасна малку, смета соговорникот за состојбата на американскиот пазар. Криптопазарот штотуку влегува во својата втора фаза на раст бидејќи ликвидноста мигрира од биткоин кон алтернативните дигитални монети (алткоини), од кои повеќето сè уште не ги достигнале претходните максимални вредности. Аналитичарите истакнуваат дека нестабилноста ќе биде многу поголема во 2025 година.

4. Помала изложеност на шпекулативни инвестиции

Со оглед на тоа што се очекуваат помалку намалувања на каматните стапки од страна на Фед во 2025 година, некои инвеститори сепак може да изберат да ја намалат својата изложеност на поризични или шпекулативни инвестиции.

„Технички, потребна е претпазливост на краток рок. Тоа не значи дека наскоро ќе видиме голем пад на цените“, напиша Крис Вестон, раководител за истражување во групацијата „Пеперстоун“ (Pepperstone Group).

5. На криптопазарот преовладува алчност, на берзите прекумерен страв 

Индексот на алчност и страв на пазарот на крипто сепак покажува дека инвеститорите се алчни, додека сликата на берзата е сосема поинаква. Таму индикаторот се промени во спротивна насока, што укажува на тоа дека инвеститорите се премногу исплашени.

 

Присутноста на стравот на берзите се одразува и врз индексот на нестабилност Cboe, или како што лаички се нарекува индекс на страв VIX, кој скокна на 28 по одлуката на Фед. Тоа беше највисоко ниво по августовскиот шок, кога Банката на Јапонија изненади со зголемувањето на каматните стапки. Индексот VIX вчера падна на 24.

Но тоа е далеку од вистинскиот страв што го видовме во 2008 година и во 2020 година, во периодот на пандемијата на ковид, кога VIX беше на највисоко ниво во последните 80 години.