Талибанците ги забранија крипто валутите во Авганистан

Авганистанската централна банка воведе забрана за криптовалути ширум земјата, а талибанскиот режим уапси неколку трговци кои се обидувале да се спротивстават на наредбата за прекин со тргувањето со дигиталните токени, информира висок полициски функционер.

Ваквата последица доаѓа откако некои Авганистанци се свртеа кон криптовалутите за да го зачуваат своето богатство и да го држат далеку од дофат на Талибанците. Крипто тргувањето стана популарен начин за пренесување пари надвор од земјата, која што е исклучена од глобалниот банкарски систем поради санкциите наметнати врз милитантската група.

Додека земјите во светот ги зајакнуваат крипто регулативите, Авганистан сега се придружува кон Кина, која во септември 2021 година ги прогласи сите крипто трансакции за нелегални.

„Централната банка ни даде наредба да ги запреме сите менувачи на валути, поединци и бизнисмени да тргуваат со виртуелните дигитални валути“, изјави во телефонски разговор Саид Шах Саадат, шеф на одделот за криминални истраги во полицијата во Хефар.

Саадат вели дека 13 лица се уапсени, од кои повеќето се ослободени со кауција, додека повеќе од 20 бизниси поврзани со крипто тргување се затворени во Херат, третиот по големина град во Авганистан, кој што претставува центар за трговија со дигитални токени.

Талибанците пред половина година рекоа дека ќе проучат дали може да се дозволат дигитални токени според исламските финансиски практики. Некои религиозни научници долго време предупредуваа дека Талибанците ќе завршат со забрана на крипто тргувањето затоа што се смета за „харам“ или забрането за муслиманите бидејќи има елементи на обложување. Сепак, другите земји каде мнозинството е муслиманско население, зазедоа поблаг став. Обединетите Арапски Емирати, на пример, дозволуваат тргување со крипто во слободната зона Дубаи, а Бахреин ги поддржува дигиталните средства од 2019 година.