Сигналите дека инфлацијата во САД го достигнала врвот се добар знак за централните банкари ширум светот, кои мораа да ги зголемуваат каматните стапки со рекордна брзина за да се борат со ценовните притисоци, изјави членот на Извршниот одбор на Европската централна банка (ЕЦБ), Франсоа Вилерој де Галхау.
Податоците, објавени минатата недела, покажаа дека потрошувачките цени во САД „се ладат“, а стапката на инфлација во октомври беше помала отколку што очекуваа економистите. Вилерој ова го опиша како добра вест во борбата против инфлацијата, бидејќи промените на цените најпрво се чувствуваат во САД.
Тој исто така додаде дека монетарната политика на Федералните резерви се прелева на остатокот од светот бидејќи монетарното затегнување го зајакнува доларот.
„Тоа што инфлацијата во САД го достигнува својот врв, како вкупната, така и основната, е добра вест за сите“, рече Вилерој за време на обраќањето на конференцијата на Меѓународниот финансиски форум во Токио.
Францускиот банкар го повтори своето предвидување дека ЕЦБ ќе го забави темпото на зголемување на трошоците за задолжување следната година, откако во декември ќе ги зголеми каматните стапки „до ниво на нормализација“ од околу два отсто. Каматната стапка на депозитите во моментов е 1,5 отсто.
„По ова, веројатно ќе продолжиме да ги зголемуваме каматните стапки, но ќе мораме да го правиме тоа пофлексибилно и побавно“, додаде тој. „Ваквото „џамбо“ покачување на стапките нема да ни стане навика“.
Вилерој, исто така, рече дека ЕЦБ ќе се фокусира повеќе на показателите за инфлација кои ги исклучуваат цените на енергијата и храната кога одлучува дали да стави крај на затегнувањето на монетарната политика.
„Процесот на зголемување на каматите може да го запрат јасни знаци за пресврт во движењето на базната инфлација“, заклучи тој.
.webp){kind=icon}
