Казахстан го крева превезот на мистеријата за руските обврзници

Казахстан соопшти дека локални брокерски куќи што минатата година купиле руски државен долг го направиле тоа главно во име на клиенти што биле жители на Казахстан и на Русија.

Откривајќи детали за маневар на пазарот на обврзници што го користеле некои инвеститори за справување со санкциите против Кремљ, казахстанската Агенција за регулирање и развој на финансискиот пазар соопшти дека трансакциите со државни хартии од вредност деноминирани во рубли, познати како ОФЗ (OFZ), генерирале зделки во вкупна вредност од 641,1 милијарда тенги (1,4 милијарда долари) од март. Агенцијата не даде претходни бројки за споредба.

Меѓу брокерите што користеле средства на клиенти во трансакциите  - кои сочинуваат околу половина од вкупниот број  - клиентите од Казахстан чинеле 48,7 проценти од купувањата во периодот до 1 декември, додека уделот на Русите бил 41,4 процент. Агенцијата исто така соопшти дека меѓу другите купувачи има и жители на Обединетите Арапски Емирати и Словачка.

„Блумберг њуз“ минатиот месец објави дека казахстански финансиски компании го купуваат рускиот државен долг со голем попуст. Регистрирањето на долгот во клириншка куќа во Казахстан потоа им овозможува на купувачите да наплатат купони и главнина.

Централниот регистар на хартии од вредност на Казахстан претходно објави дека за осум месеци забележал стократно зголемување на обемот на регистрирани еврообврзници и долг ОФЗ издадени од руското министерство за финансии.

Обемот ја нагласува растечката тенденција на потпирање на некои инвеститори на финансиската поддршка обезбедена од Казахстан по санкциите и другите ограничувања наметнати по инвазијата врз Украина, кои предизвикаа многу странци да не можат да се ослободат од рускиот долг.

Во Русија, хартиите од вредност ОФЗ што достасуваат за десет години закрепнаа блиску до номиналната вредност, според Московската берза, што покажува дека инвеститорите не очекуваат да претрпат загуби. Уште во август, кога „Блумберг њуз“ објави дека компании, вклучувајќи ја и „Барклис“ (Barclays Plc), го олеснуваат растот на тргувањето со долгот, финансиските институции нудеа понуди во регионот од 20 до 25 копејки за рубља.

Индексот на руските државни обврзници падна за околу четири отсто минатата година, надоместувајќи ги двоцифрените загуби во месеците по почетокот на војната кон крајот на февруари.

Преживеани санкции

Појавата на Руси меѓу најголемите купувачи преку казахстанските брокери, исто така, ја нагласува способноста на тамошните инвеститори да го преселат капиталот надвор од земјата и да ги искористат можностите што се отвораат поради пукнатините во режимот на санкции. Во третиот квартал, девизните депозити на руските домаќинства во странски банки се зголемија најмногу во последните барем четири години.

Трансферите во странски банки од Русија пораснаа | Русите префрлиле 1,5 илјада милијарди рубли во третиот квартал
Извор: Централна банка на Русија

Некои инвеститори најдоа решение во Казахстан бидејќи централноазиската земја ги одржува финансиските и трговските врски со Русија, избегнувајќи ја поддршката на војната или признавањето на анексијата на украинските територии.

Регулаторното тело на Казахстан соопшти дека шест казахстански брокерски куќи, кои не ги именуваше, се вклучени во тргување со руски обврзници, користејќи ги и нивните сопствени пари и средствата на клиентите.

Во согласност со законите за спречување на перењето пари, брокерските куќи го земаат предвид постојниот систем на санкции, бидејќи внимателно ги испитуваат сите потенцијални клиенти при отворањето и користењето на нивните сметки, се вели во соопштението.

Регулаторот предупреди дека инвестирањето во ОФЗ-обврзници носи зголемени ризици поради „високото ниво на нестабилност на пазарите на хартии од вредност, ниската ликвидност и заканата од секундарни санкции поврзани со геополитичката ситуација“.