Рубљата расте откако Русија воведе контроли на извозниот капитал

Руската валута имаше еден од најдобрите денови во еден месец откако владата воведе некои контроли на капиталот.

Владата доцна во средата објави дека 43 групи на компании извозници, вклучувајќи ги и нејзините главни производители на нафта, ќе треба своите приходи од продажба во странство да ги продаваат на домашниот пазар за рубли за да го обезбедат снабдувањето со девизи. Русија наметна слични барања додека рубљата паѓаше по инвазијата на Украина во 2022 година, но потоа ги укина кога валутата закрепна.

Во четвртокот вредноста на рубљата порасна 2,6 отсто во однос на доларот заклучно со 7.44 часот во Москва. Падот годинава сè уште изнесува четвртина од нејзината вредност.

„Главната цел на овие мерки е да се создадат долгорочни услови за зголемување на транспарентноста и предвидливоста на девизниот пазар и да се намали можноста за валутни шпекулации“, наведе првиот вицепремиер Андреј Белоусов во изјавата.

Рубљата меѓу најлошите валути годинава/Bloomberg Mercury

Властите ќе ги одредат количеството и другите детали за механизмот за задолжителна продажба, при што некои компании ќе треба да ги известуваат властите за своите трансакции. Во владиното соопштение се цитираше претседателски декрет за наметнување контрола на капиталот, но тој документ не беше објавен.

Што вели „Блумберг економикс“:

„Фактот што владата и Банката на Русија ја гледаат потребата за координирање на продажбата и купувањето валути укажува на влошување на локалниот девизен пазар - тој сега се смета за премногу плиток и неликвиден за да функционира на нерегулиран начин. Мерките веројатно нема да го намалат притисокот на долг рок, но може да ја зголемат понудата на девизни курсеви во наредните недели и месеци“, вели рускиот економист Александар Исаков.

Мерките објавени во средата им даваат на властите необичен степен на надзор. Руската Федерална служба за финансиско следење, позната како „Росфинмониторинг“ (Rosfinmonitoring), и централната банка ќе можат да ги видат плановите на некои компании за продажба и купување девизи на домашниот пазар.

Претставниците на „Росфинмониторинг“ исто така ќе ја следат и обезбедуваат усогласеноста на некои компании со правилата за контрола на капиталот, се наведува во документот.

Рубља за долар - притисокот трае/Bloomberg Mercury

 

Во последните неколку месеци рубљата го продолжи својот пад, погодена од зголемената инфлација во услови на големите трошоци за финансирање на војната во Украина. Вонредното зголемување на стапката од страна на централната банка во август, проследено со уште едно зголемување минатиот месец, не успеа да го спречи падот на валутата, што ја доведе рубљата на психолошкото ниво од 100 рубли за долар.

„Самото покачување на стапката е неефикасно бидејќи еден од механизмите преку кои тие вообичаено ја поддржуваат локалната валута - ’рака врз трговијата’ - е оневозможен поради санкциите и контролата на капиталот“, рече Татјана Орлова од „Оксфорд економикс“. „Враќањето на овој конкретен тип контрола на капиталот треба да помогне“.

Со помош на Силвија Вестал

Во моментов нема коментари за веста. Биди прв да коментира...

Остави коментар