.webp){kind=icon}
Москва може да го намали производството на нафта за 500.000 до 700.000 барели дневно во почетокот на 2023 година, како одговор на ограничувањето на цената на извозот на руската сурова нафта, изјави вицепремиерот Александар Новак.
„Подготвени сме делумно да го намалиме нашето производство во почетокот на следната година“, рече тој во интервју за ТВ-каналот Русија 24, додавајќи дека количеството е еднакво на пет-шест проценти од она што Русија го испумпува сега.
Иако таквото количество го опиша како незначително, намалување од тој волумен сепак може да го затегне светскиот пазар на нафта во време кога многу аналитичари предвидуваат дека побарувачката во Кина повторно ќе се зголеми.
Новак, главен преговарач на Москва во ОПЕК+ и клучен владин енергетски функционер, повтори дека Русија нема да им ја продава својата сурова нафта на купувачите и земјите што ја користат западната горна граница на цената.
Претседателот Владимир Путин пред новинарите во четвртокот соопшти дека следната недела ќе потпише декрет во однос на одговорот од земјата за ограничувањето на цената. Ќе има „превентивни мерки“, рече тој, без да наведе повеќе детали.
Според Новак, годишното руско производство на нафта годинава веројатно ќе се зголеми на 535 милиони тони. Ова е еквивалентно на околу 10,74 милиони барели дневно, врз основа на соодносот од 7,33 барели по тон. Просечното дневно производство на Русија во ноември достигна највисоко ниво во последните осум месеци, од 10,9 милиони барели, покажуваат податоците од индустријата собрани од „Блумберг“.
Ограничувањето на цената на руската нафта од 60 долари за барел, наметнато од членките на Г7 и Европската Унија, започна на 5 декември. Овој потег и забраната на ЕУ за увоз на руска нафта по морски пат, без оглед на цената, се дизајнирани да ги намалат приходите на Кремљ од нафтата и да ја попречат руската способност за финансирање на војната во Украина.
Руските нафтени товари со кои се тргува над прагот не можат да пристапат до некои клучни услуги од западните компании, вклучувајќи го и осигурувањето.
Пазарната цена на руската нафта урал, испорачана од западните пристаништа, која главно одеше во Европа пред војната, моментално е далеку под горната граница.
Сепак, во првата недела по забраната на ЕУ, рускиот поморски извоз падна за 54 отсто, на 1,6 милион барели дневно, според податоците за испорака собрани од „Блумберг“.
„Русија ќе го следи нафтениот пазар во првиот квартал за да го увиди влијанието на ограничувањето на цената пред да одлучи дали да преземе дополнителни одмазднички мерки, како што е долен праг на цената“, велат извори запознаени со руските дискусии.
