Продажбата на автомобили во Европа расте трета година по ред, предводена од електричните возила

Продажбата на автомобили во Европа во 2025 година порасна трета година по ред, откако потрошувачите купуваа повеќе подостапни електрични и хибридни модели.

Регистрациите на нови возила се зголемиле за 2,4 отсто, на 13,3 милиони единици, по уште еден раст во декември, соопшти во вторникот Европската асоцијација на производители на автомобили. Иако тоа е добра вест за индустријата погодена од царини и растечка конкуренција, продажбата и понатаму е за околу 15 отсто под нивото од пред пандемијата.

Растот во 2025 година делумно беше поттикнат од закрепнувањето на продажбата на електрични возила, бидејќи на пазарот се појавија повеќе модели со цена околу 20.000 евра (23.766 долари). Меѓу нив е градскиот автомобил „ситроен е-ц3“ на „Стелантис“ (Stellantis NV), како и увозни возила произведени во Кина од компании како БЈД (BYD Co.). Регистрациите на целосно електричните возила скокнале за 30 отсто, при што тие сочинуваат околу една петтина од вкупниот пазар.

Продажбата на нови автомобили во Европа порасна за 7,6 отсто во декември

Bloomberg

Тоа сепак е нешто под очекувањата, бидејќи возачите често се одлучуваат за автомобили што комбинираат батерија и мотор со внатрешно согорување, како надомест за недоволно развиената мрежа за полнење во регионот. „Фолксваген“ (Volkswagen) и „Порше“ (Porsche AG) ги ревидираа своите стратегии за електрификација поради побавниот раст, при што двете компании планираат повеќе хибридни модели. Продажбата на приклучни хибриди пораснала за 33 отсто минатата година, што ги прави најбрзорастечки сегмент на пазарот во Европа.

Потрошувачите беа повнимателни во првиот дел од 2025 година, кога царините на претседателот Доналд Трамп ги разнишаа пазарите и ја зголемија економската неизвесност. Тие се вратија во втората половина од годината, кога регистрациите постојано растеа. Во декември продажбата на автомобили во Европа порасна за 7,6 отсто, шести последователен месец на раст, при што силниот замав во Германија и Холандија ги надомести слабостите во Франција и Шпанија.

Додека производителите продолжуваат да лансираат нови електрични модели, некои од нив сè уште бараат поддршка од креаторите на политиките за да се зачува пазарот за автомобили на бензин. Европската комисија предложи олеснување на правилата што практично би ја запреле продажбата на нови автомобили на бензин и дизел од 2035 година. Плановите сè уште треба да поминат низ неколку пречки пред да бидат финализирани новите цели за намалување на емисиите на CO₂ кај возните паркови.

Се очекува продажбата да добие дополнителен поттик во Германија, каде што владата овој месец претстави програма за субвенции за електрични возила вредна 3 милијарди евра. Поддршката ќе биде отворена за сите производители, вклучувајќи ги и кинеските брендови, кои минатата година направија значителен пробив на европскиот пазар. Продажбата на БЈД (BYD) се зголеми повеќе од тројно, при што производителот се приближува до „Тесла“ (Tesla Inc.), чии регистрации во Европа паднале за 27 отсто во 2025 година.

Европска автомобилска продажба
Како поминаа водечките производители во декември

Bloomberg

Европската продажба на автомобили и оваа година би можела повторно да порасне, поради новите субвенции и пристигнувањето на неколку модели од следната генерација, наведува аналитичарката на „Блумберг интелиџенс“ (Bloomberg Intelligence) Џилијан Дејвис.

Кинеските брендови „најверојатно ќе го зголемат пазарниот удел, особено во Обединетото Кралство“, напиша Дејвис во анализата.