Нови трендови во луксузниот шопинг

Акциите на „Свицерланд груп“ (Switzerland Group Plc) скокнаа откако најголемиот британски продавач на часовници „Ролекс“ објави дека побарувачката за луксузни часовници останува солидна и покрај зголемувањето на цените на некои од неговите најголеми брендови, пишува „Блумберг“.

И додека листите на чекање за најбараните часовници се зголемуваат, а просечните продажни цени на луксузните стоки растат, ги прашавме трговците и експертите од епицентарот на лондонската шопинг-сцена како изгледаат работите на терен.

Дино Даурија, косопственик и генерален менаџер на „Д фрост оф Лондон“ („The Frost of London“), кој ја води оваа луксузна куќа за часовници и накит во срцето на Лондон од 2009 година, заедно со браќата Ариел и Џозеф Банин, ги истакнува значајните промени во индустријата. Физичките продавници се соочуваат со недостиг од туристи и посветени клиенти, поради што некои компании се префрлаат на закажување состаноци за посети.

„Д фрост оф Лондон“, една од последните мултибренд-продавници на Бонд стрит во Лондон

Лондонската улица Бонд, некогашна дестинација за убав накит и часовници, ја губи својата важност, додека големите системи како „Вемпе“ го напуштија пазарот во Велика Британија по 25 години. Нивната продавница, како што вели тој, е единствениот мултибренд-извор за луксузни часовници и накит што сè уште опстојува на легендарната шопинг-маршрута. Одлуката на владата на велика Британија од 2021 година да го укине повратот на данокот за туристи одигра клучна улога во овие промени, што доведе до банкротства и губење на работните места за многумина во индустријата.

„Како одговор на овие промени, посетителите сè повеќе патуваат во Милано или Париз за да направат луксузен шопинг и да си го вратат данокот преку едноставна апликација или банкомат. Во Велика Британија, малопродажните цени за луксузни стоки се генерално 13-16 отсто повисоки отколку во Европа. Сепак, некои клиенти не се чувствителни на овој аспект. Ултрабогатите Кинези станаа значаен сегмент на потрошувачи на луксузни стоки. Лијан Жао-Мис Јен, позната стилистка што стана синоним за луксузен шопинг и консултантка за личен стил за богатите кинески клиенти по дванаесет години работа во Лондон, забележува дека побарувачката за нејзините услуги се зголемува по пандемијата.

 Лијан Жао-Мис Јен, позната стилистка

„Прво, асортиманот на познати брендови не е толку комплетен, а цените во Кина се повисоки отколку во странство. Како што се подобрува животниот стандард, така се зголемуваат и барањата и вкусовите. Личен стилист е тренд што одамна започнал на Запад, па и Кинезите сакаат да уживаат во услугите на личен стилист. Им нудам нешто во кое досега немале можност да уживаат. Во првите неколку години од мојата работа не дојдоа многу луѓе во Велика Британија, освен родители на странски студенти што дојдоа да ги посетат. Контактирав со моите клиенти преку интернет за да се грижам за нивната гардероба и личен стил, а потоа испратив сè од списокот за купување во Кина“.

Кога станува збор за клиентите што бараат услуги од лични стилисти и уникатни парчиња, Мис Јен истакнува дека славните личности во Кина не мора да се најбогатата група на луѓе. Ултрабогатите доаѓаат од други области, како што се ИТ, производство, програмирање и е-трговија. Најголем дел нејзини клиенти се жени што се фокусирани на инвестирање во мода и скапи парчиња. Често се случува овие клиенти да немаат изграден моден стил: „Кога богат човек има луксузни брендови како ’Хермес’, ’Шанел’, ’Луј Витон’, тоа му станува вообичаен кодекс на облекување. Ако носите луксузен бренд со лого, тоа е исто така симбол на вашиот статус и луѓето ќе знаат дека сте богат“.

Во „Д фрост оф Лондон“ има долга листа на познати личности што се долгогодишни клиенти на куќата, а побарувачката за уникатни парчиња направени исклучиво за нив е зголемена.

„Помладите генерации на светските кралски семејства, спортисти, познати личности се нашата редовна клиентела. Тие со децении ја обликуваат нашата работа на одреден начин. На пример, член на кралското семејство на Брунеи сакаше часовник ’ричард мил’, кој е бренд што го немавме во нашето портфолио, но се потрудивме да го добиеме. Сепак, не успеавме, бидејќи брендот ја намали соработката со дилерите и се фокусира на монобренд-продавниците. Ние создаваме побарувачка во рамките на нашата база на клиенти така што секогаш ги поттикнуваме нивните соништа. Нашите познати клиенти сè повеќе бараат нешто уникатно, направено само за нив, а тоа стана наша специјалност. Денес нашите клиенти, на пример нигериски афробит-уметници, сакаат да создаваат уникатни уметнички дела преку накит и часовници. Некои од овие дела веројатно ќе завршат во музеите во иднина“, смета Даурија.

Галерија „Виторио Емануеле“, шопинг-центар во Италија

Многу колекционери на луксузни производи велат дека се фрустрирани од цените и достапноста на големите брендови, како и од долгите листи на чекање за одредени модели. Како резултат на тоа, сè повеќемина од нив се свртуваат кон нови брендови во потрага по неоткриени скапоцени камења. Овој тренд е сè повидлив во индустријата за луксузни часовници, каде што брендовите како „Минг“ се пробиваат на сцената и ги добиваат своите пет минути слава.

Даурија им дава предност на семејните бизниси, за кои верува дека се полојални и се фокусираат на обезбедување исклучителни услуги. Тој смета дека е важно да се разбере процесот на производство и дека услугата по продажбата и постоењето на гаранции се од големо значење за да се осигуриме дека инвестицијата е трајна.

„Неодамна започнавме соработка со ’Бјаншет’ (Bianchet), кој е млад бренд, специјализиран за туристички модели. Лансиран е во 2017 година од маж и жена, од страст за врвна хорологија, дизајн и нови технологии. ’Франк Мулер’ е мајстор за сложеност и секогаш е добра инвестиција. ’Франк мулер атернитас мега’ е најкомплицираниот часовник што е направен, со 36 компликации и 1.483 компоненти. (Цената се движи од 1,5 до 2,5 милиони фунти). Колку повисоко одите во спектарот, толку е подобра инвестицијата“.

„Франк мулер атернитас мега“

Тој прави споредба со фудбалот за да опише некои од водечките брендови во индустријата во кои вреди да се инвестира: „Мојата топ четворка во Лигата на шампионите изгледа вака: ’Патек Филип’ е Ливерпул со историја и традиција, ’Ролекс’ е Манчестер јунајтед со постојано присуство, ’Адемар Пиге’ е како Челзи, подоцна доаѓа до успех, а ’Ричард Мил’ е Манчестер сити - дојде од никаде и отиде директно на врвот. Не би сакал друг бренд на часовници освен ’Франк Мулер’ да го води нашиот прв тим; тој е нашиот Хари Кејн!“

Во моментов нема коментари за веста. Биди прв да коментира...

Остави коментар